Batugade : Loron, 22 Jullu 2022, Provedora de Direitos Humanos e Justiça, Jesuina Maria Ferreira Gomes, MPA, hamutuk ho Komandante Jeral Policia Nacional Timor Leste, Komisáriu Polísia, Faustino da Costa, no Unidade Asesoria Direitus Umanus (UADU-ONU), Asesora Claudia, ofisiamente ensera atividade formasaun Direitus Umanus ba Membru Polísia UPF iha Batugade.
Liu husi Intervensaun Provedora nian hateten, dezde tinan 2015 to’o tinan 2021, PDHJ ho ekipa konjunta PNTL no UADU- ONU iha Timor -Leste realiza ona formasaun ba membru PNTL hamutuk dala 20 iha territóriu Timor laran tomak ho totál partisipantes membru nain 458 kompostu husi mane 360 no feto 98 formadu husi membru PNTL ativu 4,044.
Alende ne’e, ekipa konjunta kontinua avalia ba formadu sira fulan 6 ka tinan 1 depois formasaun ho objetivu atu hatene efeitu husi formasaun. Rezultadu avaliasaun hatudu katak, husi 458 formadu, formadu membru nain 4, mak komete violasaun direitus umanus (tuir baze dadus PDHJ nian).
“Ida ne’e, ita bele hola konkluzaun katak, iha korelasaun signifikante entre formasaun ho efeitu Apresia ba Instituisaun PNTL, UADU no PDHJ nia koperasaun ba promosaun no proteje direitus umanus iha Timor Leste. Ho rezultadu ida ne’e hatudu katak wainhira membru PNTL sira hotu tuir formasaun mak númeru violasaun direitus humanus sei menus iha komunidade nia leét,” hateten Provedora.
Iha fatin hanesan Komisariu, Faustino da Costa mós haktuir katak, formasaun ida ne’e importante tebes ba Polisia UPF sira atu bele hala’o knaar ho proporsional no respeita ba direitus umanus sidadaun sira nian.
Asesora Claudia husi Unidade Asesoria Direitus Umanus (UADU) mós akresenta katak, nia espera formadu sira bele iha oportunidade atu pratika kona-ba formasaun sira ne’ebé relasaun ho Direitus Umanus nian.
Tanba PNTL mak entidade prinsipal hodi hametin lei iha nasaun Timor-Leste no salva guarda sidadaun sira nia direitu tuir lei ne’ebé iha ona no UADU kontenti suporta programa direitus umanus ne’ebé lao ona durante tinan hira nia laran no ONU Timor-Leste iha vontade atu kontinua apoiu formasaun ida ne’e.
Durante formasaun, fasilitador sira fasilita materia mak hanesan Indrodusaun Direitus Umanus, Kna’ar PNTL liga ba Direitus Umanus, Padraun Direitus Umanus relevante ba Uza Forza, Padraun Direitus Umanus relevante ba Revista, Buska, Kaer no Detensaun, Protesaun Direitus Umanus iha Situasaun Krize no iha Estadu Exesaun Konstituisionál no Konseitu Igualdade no Diskriminasaun Laek.
Formador sira husi Diresaun Promosaun PDHJ, Centro Formasaun Polisia no ONU Direitus Umanus iha Timo- Leste.
Atividade formasaun ne’e hala’o durante loron 5 hahú husi 18 to’o 22 Jullu 2022, iha Quartel Jeral UPF Batugade, Munisipiu Bobonaru, ho total partisipantes hamutuk 24.