Rezultadu Monitorizasaun PDHJ durante períodu serka sanitária entre 19-23 Março 2021 hatudu katak, maioria ofisina hirak ne’ebé lokaliza iha rotunda Comoro to’o Tasi-Tolu hala’o atendimentu normal ba kliente sira, maske serka sanitária bandu atividade negósiu iha ofisina sira.
Maioria ofisina sira la prepara bee no sabaun ba fase liman, inklui sira barak mos la kumpri regra distansiamentu sosial. Kliente sira maioria uza maskra, maibé sira balun uza latuir regras.
Ekipa PDHJ mós hala’o monitorizasaun iha pontu entrada Tasi-Tolu, hatudu katak parte PNTL kontinua fó seguransa ba movimentu públiku iha área ne’e, observa mós transporte ne’ebé tama mai Dili tenke para hodi hatun sasan hodi tula ba kareta seluk hodi lori tama ba Dili laran, enkuantu kareta ne’ebé mak sai husi Dili ba Munispiu ne’ebé tula sasan tenke transporta ba kareta seluk hodi kuntinua lori ba fatin destinasaun.
Entretantu husi observasaun nota mós katak, autoridade siguransa kuntinua hala’o kna’ar hodi pasa revista ba auto karo sira ne’ebé maka bele sai no tama ho dokumentus autorizasaun husi sentru integradu jestaun krize.
Iha mós pesoal saúde liña frente sira ne’ebé kontinua ezerse sira nia funsaun hodi garante sidadaun sira nia saúde, hodi desinfekta kareta sira ne’ebé mak tama ba kapital Dili.
Aleinde ne’e, iha mos ofisina balun iha parte rotunda Fomentu, Elemloi, ofisina balun kontinua halo atendimentu ba kliente sira, iha ofisina hirak ne’e, maioria lakumpri regra serka sanitária;
Entretantu, iha parte Hudi-Laran, Suku Bairro-Pité, iha loja material konstrusaun balun mak halo atendimentu ba kliente sira, Iha monitorizasaun nota katak, entre na’in ba loja material konstrusaun no kliente sira lakumpri regra serka sanitária.
Aleinde ne’e, PDHJ mós halo monitorizasaun iha merkadu Taibesi kona-bá regra serka sanitária, iha monitorizasaun ne’e nota katak, vendedor sira balun la uza maskra, komprador sira maioria la fase liman, maske parte autoridade kompetente prepara ona tanke no bee ba fase liman no maioria vendedor sira la kumpri distansiamentu sosial.