Dili : Loron 22 Outubro 2018, Provedoria dos Direitos Humanos e Justiça (PDHJ) liu husi diresaun Promosaun hala’o servisu konjunta ho Unidade Direitos Humanos ONU iha Timor leste (UADU) no Falintil-Forsa Defeza Timor leste (F-FDTL) fasilita treinamentu konjunta durante semana ida ba iha Polisia Militar hahu husi loron durante loron 5, iha sala enkontru Polisia Militar Kintal Kiik, hahu husi loron 22-26 Outubro 2018.
Objetivu husi treinamentu ne’e maka atu hasae koñesementu Polisia Militar sira nian kona ba direitus Humanos no governasaun diak liga ho kna’ar Falintil-Forsa Defeza Timor Leste nian .
Liu husi diskursu Provedor Dr. Silverio Pinto Baptista apela ba iha partisipante sira atu bele partisipa ho vontade no espiritu tomak tanba, treinamentu ne’e rasik sai hanesan sasukat ida atu tulun Polisia Militar sira bainhira promosaun ba iha deviza ninian.
Tanba bainhira pesoal ida atu hala’o nia knaar nudar siguransa hodi kria estabilidade ba nasaun ida mak importante tebes atu nia mós tenke iha koñesementu kona ba saida mak direitu no deveres.
Iha fatin hanesan partisipante liu husi liafuan agradesementu haktuir sira nia parte sente kontente ho treinamentu ne’e, tanba treinamentu ne’e hanesan matadalan ida atu lori fali sira hodi lao tuir lei no prinsipiu Direitus humanos ne’ebé mak iha.
Entertantu sira mos nafatin husu ba PDHJ, UADU no Comando F-FDTL rasik atu treinamentu ne’e labele para deit iha sira maibe, tenke fahe mós ba maluk unidade no komponente sira seluk.
Entertantu total partisipantes ne’ebé partisipa iha treinamentu ne’e hamutuk pesoal nain 27 husi Polisia Militar no treinadores sira mai husi PDHJ, UADU no F-FDTL rasik.