Dili : Iha loron 28 fulan Maiu 2018, Provedor Provedoria dos Direitos Humanos e Justiça (PDHJ) Dr. Silvério Pinto Baptista, Ministra Solidariedade Social (MSS) Dra. Florentina C. P. M. Smith no Ministro Administrasaun Estatal (MAE) DR. Valentim Ximenes asina termus referensia kona-ba revisaun manual treinamentu ba órgaun suku.
Objetivu husi asina termus referensia ne’e, atu halo revisaun ba manual treinamentu ba órgaun suku konaba materia sira hanesan konseitu direitus umanus, konseitu governasaun di’ak, prevene no kombate korupsaun no analiza konflitu.
Provedor Dr. Silvério Pinto Baptista hateten, instituisaun Provedoria hamutuk ho MSS no MAE asina termus referensia ida ne’e, tanba mai husi rekomendasaun husi ekipa tekniku sira iha tinan kotuk kona-ba revisaun ba manual treinamentu órgaun suku liu-liu kona-ba materia direitus umanus no analiza konflitu suku, atu nune’e ba oin ekipa tekniku sira hahu elabora no halo revisaun ba manual treinamentu komunitaria, depois finaliza manual ne’e, iha tinan oin ba Ministério rua inklui PDHJ bele aloka ona orsamentu hodi hahu fó formasaun ba lideransa komunitaria bazeia ba nesesidade no materia ne’ebé halo ona revisaun.
Provedor hatutan, durasaun tempu ba termus refensia ne’e rasik hahu ohin ekipa husi PDHJ, MSS no MAE bele hahu elabora materia no buka referensia hodi halo revisaun tanba tarjetu Dezembru 2018 revisaun manual ne’e tenki remata no halo lansamentu.
“Depois halo ona lansamentu ba manual foun ne’e iha Dezembru 2018, tenki tau orsamentu ba kada Ministério atu nune’e wainhira hala’o atividade ida-idak iha ninia rekursu rasaik”, dehan Provedor
Ministro Administrasaun Estatal (MAE) DR. Valentim Ximenes husu ba tekniku sira atu define didiak konseptu no kontiudu materia ne’ebé los, tanba benefisiariu ba formasaun ne’e mak xefi suku no membru do suku.
“Formasaun ba xefi suku importante, tanba ho materia ne’ebé importante hanesan direitus umanus atu nune’e husik hela konhesimentu ba benefisiariu hodi bele implementa iha suku laran”, hatutan Ministro.
Ministro husu mos ba tekniku sira husi instituisaun PDHJ, MAE no MSS atu fó formasaun ne’ebé espesializada, tanba benefisiariu la hanesan maske benefisiariu prinsipal mak xefi suku maibe mos husi xefi aldeia no membru konsellu do suku tanba materia balun hanesan, atuasaun la hanesan.
Ministra Solidariedade Social (MSS) Dra. Florentina C. P. M. Smith partikularmente agradese no kongratula ekipa ne’ebé asina termus referensia ne’ebé mak iha, no setimu governu mos iha fatin portidaun boafe atu kopera servisu ho estadu ne’ebé mak iha.
“Hau partikular agradese no kongratula ba ekipa ne’ebé mak formula hela asinatura termus referensia ida ne’e, ita hotu akompaña hamutuk iha mandatu setimu governu nian sei termina iha fulan Maiu nia laran maibé governu ida ne’e sei iha nafatin protidaun boafe atu kopera nafatin ba servisu estadu, governu no ema hotu, atu nune’e makina estadu lao nafatin ba oin”. Katak Ministra MSS.
Serimonia asina termus referensia ne’e, asina husi Provedor Dr. Silvério Pinto Baptista, Ministra Solidariedade Social (MSS) Dra. Florentina C. P. M. Smith no Ministro Administrasaun Estatal (MAE) Dr. Valentim Ximenes iha salaun enkontru Ministra Solidariedade Social Caicoli-Dili, no asisti husi Xefi Gabinete MSS, Diretores husi Instituisaun PDHJ, MSS, MAE, CAC no CODIVA.