Data, 19-07-2010
Provedoria Justiça Portugal no Ministeriu Justiça Portugal iha loron 16 Jullu 2010 entrega livrus kona-ba direitus umanus ba Provedoria Direitus Humanus e Justiça (PDHJ). Livrus ne’e entrega direitamente husi reprezentante Embaixada Portugal nian iha Timor-Leste Dra. Mariana Groba Gomes ba Dr. Sebastião Dias Ximenes, Provedor iha edifísiu PDHJ Caicoli Dili. Oferta livrus husi Ministeriu Justisa Portugal no Provedoria Justiça Portugal ne’e hamutuk 84 ne’e sei tau iha biblioteka Juridika PDHJ nian.
“Ho entrega livrus hirak ne’e hanesan apoiu Provedoria Justiça Portugal no Ministeriu Justiça Portugal nian mai PDHJ atu nune’e bele fasilita di’ak liu tan funsionárius PDHJ nian” hateten Dr. Sebastião Dias Ximenes.
Iha oportunidade ne’e Dr. Sebastião hato’o agradesimentu wa’in ba Provedoria Justiça Portugal, Ministeriu da Justiça Portugal liu husi embaixada Portugal iha Timor-Leste kona-ba ajuda livrus ba PDHJ. Ho ajuda ida ne’e bele hametin liu tan relasaun entre PDHJ Timor-Leste no Provedoria da Justiça Portugal nian”.
Biblioteka Juridica PDHJ ne’e inagura ona husi Prezidente da Repúblika Demokrátika de Timor-Leste, Dr. Jose Ramos Horta iha loron 8 Fulan Fevereiru 2010. Biblioteka ne’e harii tanba hetan kooperasaun husi Ajénsia Españóla ba Kooperasaun Dezenvolvimentu iha Timor-Leste (AECID).
Presiza informasaun Kontaktu
Lady Ximenes
Informasaun & Relasaun Públika PDHJ
Telemovel 7304260 ou 333 1071