Date, 02-07-2008
Provedor dos Direitos Humanos e Justiça nu’udar órgaun indepedente ida ne’ebé prevé iha Konstituisaun RDTL Artigu 27 katak Provedor dos Direitos Humanos e Justiça iha knaar atu haree no buka hatán sidadaun sira-nia keixas hasoru podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali justisa.
Bazeia ba mandatu ne’ebé iha Provedoria dos Direitos Humanos e Justiça (PDHJ) liu husi diresaun Boa-Governasaun hamutuk ho Inspector Geral (IG) hala’o workshop hamutuk durante loron rua (2-3) Julho 2008 iha ETDA Comoro Dili.
“Workshop ne’e ho nia objetivu atu partisipantes sira bele iha kuiñesimentu báziku kona-ba Governasaun ne’ebé transparente no iha akuntabilidade hodi kombate korrupsaun” hateten Ambrosio Graciano Soares Xefe Departamentu Governamental divizaun Boa-Governasaun.
“ Objetivu seluk mós partisipantes sira bele hatene kona-ba Lei númiru 31/1999, Kodiku Prosesu Penal no hatene kona-ba prosesu investigasaun ne’ebé di’ak no establesementu inspeksaun jerál iha futuru” hatutan Ambrosio.
Partisipantes ba workshop ne’e kuaze ema nain 60 mai husi Inspektur no auditor interna no nia membros sira husi ministeriu ida-idak, nune’e mós husi reprezentante ministeriu sira ne’ebé seidauk establese gabinete inspeksaun/auditoria interna iha ministeriu nia laran inklui jurnalista sira.
Orador iha workshop ne’e mak Dr. Amandio de Sá Benevides, adjuntu Provedor, Dr. Ivo Jorge Valente, Adjuntu Prokurador Jeral TL, Dr. Francisco Carvalho, Inspetór Jeral Interino no Dr. Marito Magno, Direitur Boa-Governasaun PDHJ.
Presiza informasaun Kontaktu
Lady Ximenes
Informasaun & Relasaun Públika PDHJ
Telemovel 726 1843 ou 333 1071