Data, 03-09-2007
Bazeia ba Artigu 27 Lei-Inan Timor-Leste nian, ne’ebé prevee ona kona-ba ezisténsia Provedór Direitos Humanos no Justiça nu’udar órgaun indepedente ida ne’ebé iha knaar hodi promove no protéje Direitos Humanos iha Nasaun Timor-leste.
Nune’e mós tuir Lei Provedor Direitus Humanus e Justiça No. 7/2004 artigu 3 pontu 1 hateten katak “Provedor Direitus Humanus e Justiça iha dever atu hala’o ninia funsaun sira iha ámbitu atividade sira entidade públiku nian, partikularmente Governu nian, PNTL, Servisu Prizaun no F-FDTL”.
Bazeia ba mandatu Provedoria dos Direitos Humanos e Justiça (PDHJ) nian ne’ebé iha PDHJ hahu iha loron 3 to’o 11 Setembro 2007 sei hala’o monitorizasaun iha distritu Baucau, Viqueque no Lautem.
“Monitorizasaun ne’ebé hala’o husi staf PDHJ parte area direitos humanos ne’e hala’o konjunta ho staf husi NGO Yayasan HAK sei fahe ba ekipa rua mak ekipa ida sei fó atensaun ba prizaun no sela polisia no ekipa ida seluk atu haree direitamente ba kondisaun no situasaun IDPs (Ema Deslokdau Internu) sira nian, hateten Dr. Valerio Magno Ximenes, direitur ba area Direitos Humanos PDHJ”.
“Liu tan Valerio dehan liu husi monitorizasaun ne’e monitor sira atu haree ema hirak ne’ebé oras ne’e deten hela iha sela Polisia no prizaun. Alien ida ne’e monitor sira mos hodi haree direitamente ba kondisaun no situasaun IDPs (Ema Deslokadu Internu) relasaun ho violensia ne’ebé akontese iha Baucau, Viqueque no Lautem”.
Tuir Artigu 5 pontu 2 Lei Númiru 7/2004 kona-ba Estatutu Provedór de Direitos Humanos e Justiça (PDHJ) katak rejultadu monitorizaun ne’e PDHJ sei hato’o rekomendasaun ba orgaun kompetente sira hanesan Governu Timor-Leste no PNTL.
Atu kordena servisu di’ak liu tan iha baze PDHJ mós fó ona karta kuiñesimentu ba PNTL, F-FDTL no UNPOL atu bele fó apoi seguransa ba PDHJ hodi hala’o nia servisu monitorizasaun iha fatin ne’ebé refere hodi nune’e bele dezenvolve nasaun ne’e ho di’ak no susesu iha ambiente ne’ebé paz, seguru no trankulidade.
“Espera katak monitor sira sei hala’o Monitorizasaun ho profisional no imparsialidade iha baze hateten Dr. Valerio”.
Persiza informasaun Kontaktu
Lady Ximenes
Informasaun & Relasaun Públika PDHJ
Telemovel 726 1843 ou 333 1071