Date 11-07-2007
Timor-Leste nu’udar nasaun foun ida iha milinium foun ne’e, maibé sei menus ba informasaun no edukasaun kona-ba korupsaun. Tan ne’e Provedoria dos Direitos Humanos e Justiça (PDHJ) liu husi Diresaun Anti-Korupsaun sei hala’o atividade Konkursu Dezeñu ne’ebé sei realiza iha loron 12 Jullu 2007.
Konkursu dezeñu ne’ebé ho nia topiku Oinsa dalan atu kombate korupsaun ne’e sei loke husi Provedór Interino Dr. Amandio de Sá Benevides, no konkursu ba estudantes pre-Primaria no Pre-Sekundaria sei hala’o iha edifisiu PDHJ Kaikoli Dili no konkursu ba estudantes Sekundaria sei hala’o iha estadion Munisipal Dili.
“Atividade Konkursu ne’e sei partisipa husi estudante sira husi eskola Pre-Primaria, Pre-Secundaria no Secundaria iha kapital Dili. Liu husi atividade ne’e atu bele loke estudante sira nian hanoin katak korupsaun ne’e hanesan dezafiu bo’ot ida ba futuru nasaun Timor-Leste nune’e persiza halo prevensaun no kombate, hateten Adjunto Provedor Dr. Silverio Pinto Baptista”.
Atividade konkursu dezeñu ne’e hanesan meus ida atu fahe informasaun ba públiku nomos hanesan edukasaun sivika ida ba estudantes sira atu sira bele hatene hahalok korupsaun, ne’ebé dala ruma sira rasik hasoru tiha ona, maibé sira la sente katak hahalok ida ne’e mak korupsaun.
“Korupsaun presiza halo prevensaun no kombate, tanba wainhira korupsaun la halo prevensaun hahu agora mak sei fó impaktu negativu ba dezenvolvimentu no mós sei haburas dezempregu iha Timor-Leste, hatutan Dr. Silverio”.
Iha parte seluk Adjunto Provedór ba area Direitus Humanos ne’e hateten katak korupsaun presiza halo prevensaun no kombate tanba sei fó impaktu la di’ak ba futuru nasaun joven ida ne;e no povo ki’ik no kiak sira mak sei terus. Nune’e persiza partisipasaun husi sidadaun tomak atu servisu hamutuk ho Provedoria dos Direitos Humanos e Justiça (PDHJ) hodi bele halo prevensaun no kombate atu nune’e labele fó vantajen ba ema ne’ebé iha hanoin atu hala’o hahalok ne’ebé laloos, sublina Dr. Silverio.
Presiza informasaun kontaktu
Lady Ximenes, Informasaun & Relasaun Públika PDHJ
HP, 726 1843 ou 333 1071