Ainaro, 12–16 outubru 2026 – Provedoria Direitus Umanus no Justisa (PDHJ), iha kooperasaun ho Polísia Nasionál Timor-Leste (PNTL) no Unidade Asesoria Direitus Umanus (UADU), hala’o formasaun kona-ba kna’ar PNTL no direitus umanus iha Munisípiu Ainaro husi 11 to’o 16 outubru 2026 ho partisipasaun ofisiál polísia na’in 25. Serimónia abertura ne’e hetan partisipasaun husi Provedóra-Adjunta Direitus Umanus, Maria Marília da Costa; Asesora Seniór Direitus Umanus UADU, Azwa Pietra; no Komandante PNTL Munisípiu Ainaro, Superintendente Xefe Emílio dos Santos. Iha nia diskursu abertura, Provedóra-Adjunta subliña katak respeita direitus umanus nu’udar obrigasaun konstitusionál ba polísia, refere ba Artigu 147 Konstituisaun Timor-Leste, ne’ebé hateten katak prevensaun krime tenke hala’o ho respeitu loloos ba direitus umanus. Nia subliña: “Direitus umanus la’ós Nasoins Unidas mak lori, no mós la’ós PDHJ mak lori — ne’e mandatu konstitusionál. Bainhira de’it PNTL ezerse nia funsaun, tenke respeita nafatin direitus umanus.”
Treinamentu ne’e ho objetivu atu hametin ofisiál polísia sira-nia komprensaun kona-ba sira-nia responsabilidade profisionál, sosiál no konstitusionál, inklui uzu forsa ne’ebé legál no proporsionál, prevensaun tortura, respeitu ba dignidade umana, polisiamentu komunitáriu no manutensaun konfiansa públiku. Provedóra-Adjuntu fó hanoin ba partisipante sira katak ofisiál polísia sira tenke serbí no proteje komunidade enkuantu mantein imparsiál no responsavel tuir Konstituisaun no lei sira. Nia mós subliña katak konduta profisionál esensiál atu asegura intervensaun legál sira no proteje direitu ema hotu nian, inklui feto, labarik, suspeitu no grupu vulneravel sira seluk. Atividade ne’e halo parte iha akordu kooperasaun entre PDHJ, PNTL no UADU hodi promove konsiensia direitus umanus no hametin respeitu ba direitus umanus iha polisiamentu.
This post is also available in: English