Same, Manufahi, 21 lullu 2026 – Provedór Direitus Umanus no Justisa, Virgílio da Silva Guterres “Lamukan”, hamutuk ho Prezidente Autoridade Munisípiu Manufahi, Luis Marçal da Costa Tavares, lansa ofisialmente konstrusaun ba moru protesaun edifísiu PDHJ Delegasaun Teritoriál Same, lokaliza iha Suco Letefoho, Postu Administrativu Same Vila.
Konstrusaun moru protesaun ne’e sei hala’o husi kompania Boru Mandako Unipessoal, Lda. tuir kontratu no. 13/PDIM-SMA/PAM-MF/VII/2026. Tuir kontratu, projetu ne’e tuir planu sei remata iha 31 dezembru 2026, ho totál orsamentu US$78,388,50, ne’ebé finansia hosi Prezidente Autoridade Munisípiu Manufahi.
Iha ninia diskursu, Provedór Virgílio da Silva Guterres “Lamukan” hato’o ninia apresiasaun, lori Delegasaun Territoriál Same PDHJ nia naran no pesoál PDHJ tomak, ba Autoridade Munisípiu Manufahi nia apoiu hodi finansia konstrusaun moru protesaun ba eskritóriu PDHJ nian.
Provedór nota katak inisiativa ne’e mosu iha tempu eis-Prezidente Autoridade Munisipál, Arantes Isaac, ne’ebé konsistentemente hatama PDHJ iha prioridade dezenvolvimentu munisípiu nian. Nia lembra katak, bainhira eskritóriu munisipál sira lokaliza iha Luak, PDHJ mós hetan alokasaun espasu eskritóriu iha ne’ebá.
Liután nia hato’o ninia satisfasaun ba Prezidente Autoridade Munisipál atuál ne’ebé kontinua ona inisiativa pozitivu sira ne’ebé hahú hosi nia predesesór. Provedór hateten katak apoiu ne’ebé Autoridade Munisípiu Manufahi fó sei sai hanesan referénsia ne’ebé iha valór ba PDHJ iha ninia empeñu iha futuru ho Governu, partikularmente Ministériu Administrasaun Estatál (MAE) no munisípiu sira seluk. Nia esplika katak PDHJ agora daudaun funsiona Delegasaun Territoriál haat—iha Same, Maliana, Baucau, no Oe-Cusse—ne’ebé hotu-hotu hasoru dezafiu ne’ebé hanesan kona-ba falta muru perímetru protesaun. Nia espresa esperansa katak inisiativa iha Same sei enkoraja munisípiu sira seluk atu fó apoiu hanesan.
Nia mós husu ba kontratór atu hala’o konstrusaun ne’e ho responsabilidade, profisionalizmu, no padraun kualidade ne’ebé aas. Provedór subliña katak konstrusaun moru ne’e la’ós de’it projetu infraestrutura ida maibé mós kontribuisaun ida ba harii nasaun. Nia salienta katak fundu públiku tenke reflete iha serbisu ho kualidade no enkoraja Boru Mandako Unipessoal, Lda. atu kompleta projetu ne’e tuir kontratu enkuantu garante katak traballadór sira simu sira-nia saláriu hanesan hakerek iha akordu.
Ko’alia iha serimónia ne’e, Luis Marçal da Costa Tavares, Prezidente Autoridade Munisípiu Manufahi, afirma katak projetu moru protesaun hetan prioridade hafoin tetu didi’ak pedidu sira ne’ebé hato’o husi instituisaun munisípiu oioin. Nia nota katak PDHJ Delegasaun Territoriál Same, hamutuk ho Delegasaun Servisu Notariadu, entre instituisaun dahuluk sira ne’ebé selesionadu hodi hetan benefísiu hosi inisiativa ne’e.
Nia esplika liután katak investimentu ne’e halo parte iha Autoridade Munisipál nia kompromisu ne’ebé luan liu atu hadi’a infraestrutura públika ba benefísiu povu hotu iha Manufahi. Nu’udar PDHJ fornese atendimentu-keixa esensiál no servisu públiku ba komunidade lokál, importante atu garante katak instituisaun ne’e iha infraestrutura no kondisaun servisu ne’ebé adekuadu. Nia destaka mós koordenasaun no kooperasaun forte ne’ebé durante ne’e eziste entre PDHJ ho Autoridade Munisipál no hato’o nia kompromisu atu mantein nafatin parseria ne’e iha futuru.
Entretantu, Luis Pereira, Diretór Boru Mandako Unipessoal, Lda., enkoraja traballadór empreza tomak atu hala’o projetu ne’e ho dedikasaun no profisionalizmu. Nia salienta, entrega serbisu ho kualidade reflete la’ós de’it responsabilidade profisionál maibé mós sentidu nasionalizmu no orgullu nu’udar oan-mane no oan-feto Same no Timor-Leste nian.
Iha seremonia lansamentu ne’e hetan partisipasaun husi Diretóra Delegasaun Teritorial PDHJ Same no staff sira, Diretór Teras, Komandante PNTL Komandu Munisípiu Same, Autoridade lokal, enjeñeirus, no trabalhadores konstrusaun sira.
This post is also available in: English