Dīli, 12 juñu 2026 – Provedór Direitus Umanus no Justisa, Virgílio da Silva Guterres “Lamukan” hato’o parabéns ba Centro Nacional Chega! (CNC) kona-ba inaugurasaun Sentru Arkivu Chega!, marku importante ida iha Timor-Leste nia esforsu atu prezerva memória istórika no promove edukasaun direitus umanus.
Estabelesimentu Sentru Arkivu reflete kompromisu CNC nian hodi implementa rekomendasaun sira hosi Komisaun ba Akollimentu, Lia-loos no Rekonsiliasaun (CAVR), partikularmente sira ne’ebé relasiona ho institusionalizasaun memória no promosaun direitus umanus liuhosi edukasaun no aprendizajen. Ida-ne’e mós avansa vizaun atu kria sentru nasionál ida ne’ebé dedika ba memória, peskiza, no aprendizajen ba jerasaun agora no futuru.
Provedór simu ho laran-haksolok inisiativa importante ida-ne’e tanba sentru ne’e la’os de’it atu arkiva rejistu istóriku sira. Sentru Arkivu Chega! sei sai hanesan espasu ida iha-ne’ebé sidadaun, estudante, investigadór, polítiku, no vizitante sira bele halo interasaun ho istória Timor-Leste nian, reflete kona-ba lisaun sira pasadu nian, no aprofunda sira-nia komprensaun kona-ba valór sira direitus umanus nian, justisa, no demokrasia.
Prezerva dokumentu istóriku sira, sasin sira, no evidénsia sira esensiál la’ós de’it atu salvaguarda nasaun nia memória koletiva maibé mós atu fó onra ba esperiénsia sira hosi sobrevivente sira no vítima sira hosi violasaun direitus umanus iha pasadu. Hodi asegura katak istória sira-ne’e sei hanoin no asesivel, Sentru kontribui ba harii sosiedade ida ne’ebé aprende hosi nia istória no nafatin iha kompromisu atu prevene rekorrénsia hosi abuzu sira.
Provedór elojia CNC, ninia parseiru sira, no sira hotu ne’ebé kontribui hodi halo vizaun ne’e sai realidade. Lansamentu husi Sentru Arkivu Chega! reprezenta investimentu valiozu iha edukasaun, peskiza, lembransa, no promosaun kultura direitus umanus no dame iha Timor-Leste.
Dezeja Sentru ne’e kontinua sai hanesan sentru ba aprendizajen, reflesaun, no memória, hodi ajuda hametin fundasaun sira justisa nian, rekonsiliasaun nian, no respeitu ba dignidade umana ba jerasaun sira tuirmai.
This post is also available in: English