Díli, 27 abril 2026– Provedor ba Direitus Umanus no Justisa (PDHJ), Virgílio da Silva Guterres “Lamukan”, akompaña husi Provedóra-Adjunta ba Direitus Umanus, Maria Marilia da Costa, Diretóra ba Promosaun, Joanita Silvira da Costa, no Xefe UAJAB, Teresinha Ximenes, hala’o enkontru Altu ho Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, no Segundu Komandante Jerál PNTL, Komisáriu Asistente Polísia Natercia Eufrasia Soares Martins, ne’ebé akompaña husi Inspetór Jerál PNTL, Komisáriu Asistente Polísia Hermenegildo Gonçalves da Cruz. Enkontru ne’e hala’o iha salaun enkontru VIP iha Kuartél Jerál PNTL iha Caicoli.
Sorumutu ne’e konvoka ho objetivu klaru atu hametin kooperasaun institusionál entre PDHJ no PNTL, hodi reafirma ami kompromisu hamutuk atu avansa direitus umanus no estadu direitu iha Timor-Leste. Kooperasaun hanesan ne’e la’ós de’it administrativu maibé fundamentál atu garante katak polísia sira funsiona ho integridade, responsabilizasaun, no respeitu kle’an ba direitu fundamentál sidadaun ida-idak nian. Diskusaun sira foka liuliu ba kontinuasaun formasaun Direitus Umanus no Boa Governasaun ba ofisiál PNTL sira, inisiativa ida ne’ebé durante ne’e la’o hela no sai nafatin fatuk-inan ba parseria entre instituisaun rua ne’e. Tuir planu PDHJ nian, formasaun ba PNTL iha tinan 2026 sei konsentra ba munisípiu Dili, Ainaro, Liquiça, no Lautém; maibé, formasaun ne’e seidauk hahú tanba tranzisaun lideransa PNTL nian ne’ebé la’o hela. Maski nune’e, parte rua espresa otimizmu katak formasaun sei hahú fali lalais bainhira estrutura lideransa foun iha ona, hodi rekoñese katak kapasitasaun oportunu maka esensiál atu profisionaliza ofisiál polísia sira.
Enkontru ne’e mós reflete Estatutu PDHJ, ne’ebé identifika momoos PNTL nu’udar instituisaun xave tolu ne’ebé PDHJ iha mandatu atu koopera hamutuk, hamutuk ho FALINTIL-FDTL no Guarda Prizionál. Enkuadramentu legál ida-ne’e subliña importánsia hosi diálogu sustentavel no asaun konjunta entre PDHJ no PNTL hodi avansa protesaun direitus umanus iha setór seguransa hotu-hotu, no ida-ne’e sai nu’udar fundasaun metin ba parseria institusionál ba tempu naruk. Iha sorumutu ne’e, Provedór hato’o parabéns no bemvindu ba lideransa foun PNTL nian, hodi dezeja susesu iha sira-nia knaar ne’ebé dezafiante. Nia mós rekoñese difikuldade ne’ebé ofisiál PNTL sira hasoru no reafirma katak PDHJ sei kontinua halo advokasia ba hadi’ak sira-nia kondisaun servisu no bem-estar jerál, tanba membru polísia ne’ebé hetan apoiu di’ak no ekipadu di’ak liu atu proteje direitu sidadaun timoroan hotu-hotu nian.
Komandante Jerál PNTL hato’o benvindu ba delegasaun PDHJ no realsa katak formasaun direitus umanus ba nia membru sira relevante tebes no nesesáriu atu ajuda sira sai ofisiál profisionál, étika, no orientadu ba komunidade. Segundu Komandante Jerál Natercia haktuir hikas katak kooperasaun entre PNTL no PDHJ importante tebetebes, subliña nesesidade atu halo revizaun ba Memorandu Entendimentu anteriór entre instituisaun rua ne’e no, karik presiza, inkorpora matéria adisionál sira hodi hadi’a liután no institusionaliza sira-nia kooperasaun. Etapa proativu ida-ne’e reflete instituisaun rua nia dedikasaun hodi evolui sira-nia parseria hodi hasoru dezafiu sira ne’ebé mosu no tane-aas padraun sira prátika direitus umanus nian ne’ebé aas liu. Sorumutu ida ne’e marka tan marku importante ida iha parseria ne’ebé buras daudaun entre PDHJ no PNTL, hodi hatudu katak bainhira instituisaun direitus umanus no forsa seguransa sira serbisu hamutuk, manan-na’in ikus liu mak povu Timoroan ne’ebé merese justisa, dignidade, no protesaun tuir lei.
This post is also available in: English