Covalima, 24 juñu 2025 — Provedór Direitus Umanus no Justisa, Virgílio da Silva Guterres “Lamukan”, akompaña husi Diretór Delegasaun Territoriál Maliana PDHJ nian, Domingos Tavares, halo vizita kortezia ida ba Prezidente Munisípiu Covalima Miguel Armada Cardoso, hodi aborda kolaborasaun besik liu kona-ba asuntu direitus umanus no governasaun di’ak iha nível munisípiu.
Iha sorumutu ne’e, Provedór propoin planu kolokasaun pontu fokal PDHJ na’in rua iha Administrasaun Munisipiu Covalima. Ofisiál sira ne’e sei sai hanesan pontu asesivel ba públiku atu hato’o keixa sira relasiona ho violasaun direitus umanus no mal-administrasaun, liuliu ba sira ne’ebé labele halo viajen ba Maliana ka Díli.
Guterres subliña importánsia atu halo PDHJ nia servisu sira disponivel liután iha nivel munisípiu, hodi nota katak membru komunidade barak hasoru difikuldade atu asesu ba mekanizmu keixa formál sira. Nia mós hato’o preokupasaun sira kona-ba seguransa públika tuir relatóriu sira foin lalais ne’e iha mídia sosiál kona-ba indivídu deskoñesidu sira ne’ebé alegadamente halo asédiu ba viajante sira iha estrada boot sira—asaun sira ne’ebé estraga komunidade nia sentidu seguransa nian.
Iha vizita ne’e, Provedór entrega formalmente Relatóriu Monitorizasaun PDHJ kona-ba asuntu direitus umanus no governasaun iha Timor-Leste ba Prezidente Autoridade Munisipál.
Guterres mós hato’o preokupasaun ida kona-ba prosesu asina ba gia-de-marxa husi funsionáriu sira nia husu ba Prezidente atu verifika didi’ak durasaun loloos viajen ida-idak nian molok asina MOP. Nia salienta, períodu viajen ne’ebé aprova tenke koresponde ho númeru loron ne’ebé pesoál sira sei hala’o duni kna’ar, hodi prevene mal uzu rekursu públiku.
“Se MOP hateten semana ida, entaun viajen ne’e tenke dura duni semana ida—la’ós de’it loron rua ka tolu. Buat ne’ebé menus reflete governasaun ne’ebé ladi’ak no fiskalizasaun ne’ebé fraku,” nia hateten.
Hatan ba ne’e, Prezidente Cardoso hato’o bemvindu ba inisiativa ne’e, hato’o agradesimentu ba PDHJ nia planu hodi hametin nia prezensa iha Covalima. Nia subliña katak iha pontu fokál sira iha estrutura munisípiu nia laran sei ajuda hadi’a asesu públiku ba justisa no enkoraja responsabilizasaun iha nivel lokál.
“PDHJ nia prezensa sei ajuda garante katak keixa sira ne’ebé relasiona ho direitus umanus no governasaun hetan atendimentu lalais no ho profisionál. Ami apoia tomak ekipa no hein katak sira atua ho imparsiál hodi hamenus diskriminasaun no hametin justisa iha ami nia munisípiu”, nia hatete.
Kona-ba preokupasaun seguransa rodoviária, Prezidente garante katak, administrasaun munisípiu koordena ativu ho Polísia Nasionál Timor-Leste (PNTL) no autoridade lokál sira hodi halo monitorizasaun no foti asaun legál hasoru indivídu ka grupu sira ne’ebé ameasa seguransa públika.
Agradese mós ba Provedór nia rekomendasaun konstrutivu sira kona-ba asuntu governasaun interna, liuliu kona-ba kumprimentu ba protokolu MOP nian.
Enkontru ne’e hala’o iha sala konferénsia prinsipál Autoridade Munisipál Covalima nian, ne’ebé partisipa husi Sekretáriu Munisipál no diretór departamentu sira hotu.
This post is also available in: English