Kathmandu, Nepal – 5 setembru 2024 —Adjunta-Provedóra ba Direitus Umanus, Maria Marilia da Costa, partisipa iha Konferénsia Internasionál kona-ba Inkluzaun Jéneru iha Instituisaun Nasionál sira Direitus Umanus nian (NHRIs), ne’ebé hala’o hosi 3-5 setembru 2024, iha Kathmandu, Nepal. Konferénsia ne’ebé organiza hosi Komisaun Nasionál Direitus Umanu Nepal nian (NHRCN) iha kolaborasaun ho Fórum Ázia Pasífiku hosi Instituisaun Nasionál Direitus Umanu (APF) no Aliansa Globál hosi Instituisaun Nasionál Direitu Umanu (GANHRI), hanesan eventu signifikativu ida ne’ebé ho objetivu atu avansa igualdade jéneru iha NHRI sira nia laran no rezolve dezafiu krítiku sira ne’ebé afeta feto no labarik-feto sira.
Konferénsia ne’e foka ba avaliasaun oinsá NHRI sira bele hametin sira nia kumprimentu ba Prinsípiu Paris nian liuhosi inkorpora inkluzaun jéneru iha sira nia estrutura no operasaun sira. Ida-ne’e mós haree filafali progresu ne’ebé halo ona dezde Deklarasaun Amman, ne’ebé husu atu iha balansu jéneru iha NHRI no destaka bareira sira atu atinji igualdade jéneru.
Iha loron 4 fulan-setembru, konferénsia ne’e foku iha diskusaun painél notável ida kona-ba “Integra Perspetiva sira Jéneru nian iha Polítika no Revizaun Lejislativa hosi NHRI sira.” Sesaun ida-ne’e, ne’ebé prezide hosi Anand Mohan Bhattarai, Eis-Juis Supremu Tribunál Nepal nian, no fasilita hosi Jerald Joseph, Eis-Komisáriu SUHAKAM nian, esplora oinsá NHRI sira bele inkorpora perspetiva jéneru nian iha sira-nia polítika no enkuadramentu lejislativu sira. Provedora-Adjunta Maria Marilia da Costa maka panelista distintu ida, ne’ebé kontribui nia hanoin sira kona-ba papél NHRI sira nian hodi asegura revizaun no lejislasaun sira ne’ebé sensivel ba jéneru.
Painél ne’e mós inklui: Vijaya Bharathi Sayani, Prezidente Interinu hosi Komisaun Nasionál Direitus Umanus Índia nian, Hari Kurniawan, Komisáriu Komisaun Nasionál Direitus Umanus Indonézia nian (Komnas HAM) no Erica Powell, Diretóra Interina ba Ekipa Diskriminasaun Seksuál, Komisaun Direitus Umanus Austrália nian
Diskusaun sira subliña importánsia atu integra perspetiva jéneru nian iha funsaun sira NHRI nian no nesesidade ba esforsu kontínua sira atu rezolve barreira sistémiku sira no dezafiu globál sira ne’ebé mosu. Konferénsia ne’e konklui ho adosaun Deklarasaun Kathmandu nian, ne’ebé sei sai hanesan roteiru ida ba avansu estratéjia sira integrasaun jéneru nian iha NHRI.
Atu hetan informasaun liután kona-ba konferénsia no inisiativa sira ne’ebé la’o hela, vizita Website Konferénsia nian: https://www.genderconference.nhrcnepal.org/?fbclid=IwY2xjawFHUApleHRuA2FlbQIxMAABHT6k68ZBr_i6eUsJNQvILUMbXVuJoS__AUwhiacr0O1nn9T9H7gOv-54zQ_aem_rZ-miGIdvmeRVyngrLU9_A
This post is also available in: English