Manatuto, 26 setembru 2025 – Provedór Direitus Umanus no Justisa (PDHJ), Virgílio da Silva Guterres “Lamukan,” hola parte iha diálogu komunitáriu iha Barique-Natarbora, Munisípiu Manatuto, ne’ebé organiza husi ONG FONGTIL. Diálogu ne’e halibur organizasaun sosiedade sivíl sira, reprezentante governu nian, no komunidade lokál sira hodi diskute kona-ba projetu LNG ne’ebé governu planeia ona iha Natarbora no mós asuntu dezenvolvimentu nasionál ne’ebé luan liu. Tema prinsipál mak “Haforsa Jestaun Fundu Petrolíferu ho Efisiénsia, Efikásia, Reziliénsia, no Sustentabilidade ba Povu Timor-Leste nia Moris-Di’ak,” ne’ebé subliña importánsia atu tau komunidade sira iha sentru ba elaborasaun polítika no garante katak sira-nia direitu no moris hetan salvaguarda.
Iha ninia intervensaun, Provedór subliña katak diálogu nu’udar fatuk-inan ba demokrasia no governasaun di’ak, ne’ebé liga komunikasaun entre estadu no ninia sidadaun sira. Nia salienta, projetu boot dezenvolvimentu sira hanesan LNG tenke garante respeitu ba sidadaun sira-nia direitu, liuliu kona-ba na’in ba rai, uma, no asesu ba servisu sira. “Dezenvolvimentu labele mai ho kustu ema nia direitu. Diálogu mak xave atu harii konfiansa, hetan solusaun ne’ebé justu, no garante katak komunidade sira sente sai na’in ba desizaun sira ne’ebé afeta sira nia moris,” dehan Virgílio Guterres.
Provedór reafirma mandatu konstitusionál PDHJ nian atu monitoriza asaun governu nian, atende sidadaun sira-nia keixa, no garante katak komunidade sira hetan konsulta ho signifikativu iha prosesu dezenvolvimentu. Hodi akompaña diálogu sira hanesan ne’e, PDHJ buka atu garante katak projetu nasionál sira fó benefísiu reál enkuantu prevene injustisa foun sira. Eventu ne’e hetan partisipasaun husi Vice Primeiru Ministru Mariano Assanami Sabino, Sekretariu Estadu Agua no Saneamentu, Prezidente Autoridade Munisipiu Manatuto, lider relijiozu, autoridade lokal, estudante, no reprezentante komunidade sira seluk.
This post is also available in: English