Dili, 12 agostu 2024 — Provedór Direitus Umanus no Justisa, Virgílio da Silva Guterres ‘Lamukan’ hola parte iha lansamentu rejultadu levantamentu públika dahuluk hosi Matadalan Survey & Research Institute (M-SRI) ba tinan 2024, ne’ebé foka liu ba “Satisfasaun Públika ho Dezempeñu Governu Konstitusionál IX iha Tinan Dahuluk: Períodu: jullu 2023 – jullu 2024.”
Levantamentu ne’e ho objetivu atu apoia governu hodi formula polítika ba dezenvolvimentu no foti desizaun informadu ne’ebé serve interese públiku.
Levantamentu ne’ebé hala’o iha munisípiu 12 inklui Rejiaun Administrativa Espesiál Oé-Cusse Ambeno (RAEOA) ne’e halo avaliasaun ba ministériu prioridade 12. Rezultadu sira hatudu katak 57% hosi respondente sira satisfeitu ho governu nia dezempeñu, 38% la satisfeitu, no 4.5% la responde.
Provedór subliña papél krítiku hosi peskiza bazeia ba evidénsia hodi haburas boa governasaun no tane aas direitus umanus. Nia nota katak dadus levantamentu nian ajuda governu foti desizaun sira ne’ebé informadu hodi hasa’e servisu esensiál sira hanesan kuidadu saúde no edukasaun, hodi garante katak servisu públiku sira hatan ba sidadaun sira nia nesesidade no direitu fundamentál sira hetan protesaun.
This post is also available in: English