Suai, 1 juñu 2024 – Provedór Direitus Umanus no Justisa, Virgílio da Silva Guterres ‘Lamukan’ hamutuk ho Parseiru Xave sira selebra Loron 1 fulan Juñu, Loron Internasionál Labarik ni’an iha Suai, Covalima.
Iha nia lia-menon badak, Provedór husu ba estadu atu iha seriedade investe ba labarik sira nia futuru. “Ita iha fundus ba idozu no veteranu sira, maibé ita laiha fundu espesiál ba labarik.” Dehan Provedór. Tanba ne’e Lamukan husu atu governu prioritiza alokasaun orsamentu jerál estadu ba setór xave sira hanesan edukasaun, saúde no agrikultura hodi salva guarda labarik sira nia bein estar.
Tuir Lamukan investimentu ba setór tolu ne’e sei fo impaktu direita ba labarik sira nia dezenvolvimentu. “Investimentu iha agrikultura ne’e liga ba nutrisaun nudar fonte importante ba labarik sia nia dezenvolvimentu fíziku, nune’e mós ho edukasaun ne’ebé liga ba dezenvolvimentu intelektuál no saúde atu labrik sira bele saudável.” Provedór hatete.
Guterres Lamukan hato’o nia preukupasaun kona-ba persentajen boot ba kazu ra’es badak ne’ebé Timor-Leste hasoru no husu atu governu sériu atu kombate. “Timor-Leste nia taxa ra’es badak ne’e a’as liu iha mundu 47%, sé ida ne’e kontinua rai ida ne’e futuru iha ameasa nia laran. Medida urjente ténke foti.” Ho ida ne’e Provedór hateten katak PDHJ sei halo advokasia ba governu no parlamentu atu konsidera medida prevensaun sira iha alokasaun orsamentu jerál estadu-ni’an.
Relasiona ho violénsia hasoru labarik, Provedór Lamukan apela atu hapara violénsia ho forma saida de’it hasoru labarik, inklui iha eskola sira. Ba família, estadu no komunidade atu halo sira nia dever hodi proteje labarik sira hanesan temi iha Konstituisaun artigu 18.
Saudasaun koloroza ba labarik sira iha Timor-Leste no mundu tomak ba loron espesiál ne’e.
Ba asuntu mídia kontaktu:
Joana da Cruz +670 78566745
Antoninho Bernardino +670 77709837
E: media@pdhj.tl
This post is also available in: English