Dili, 29 Agostu 2024 — Etapa daruak hosi programa formasaun kona-ba “Komunikasaun iha Era Mídia Sosiál no Plataforma Teknolojia nian,” ne’ebé organiza hosi Asosiasaun Informasaun no Teknolojia Progresiva Timor-Leste (ITP-TL), konklui ho susesu hosi Loron 27 to’o 29 Agostu 2024. Formasaun ne’e hala’o iha Fundasaun Oriente iha Dili no hetan partisipasaun husi ofisiál na’in rua husi Provedoria Direitus Umanus no Justisa (PDHJ).
Iha abertura ba formasaun ne’e, Provedór- Adjuntu ba Boa Governasaun, Rigoberto Monteiro, subliña papél esensiál proteje direitu sidadaun nian iha era dijitál. “Estadu tenke garante direitu asesu ba informasaun no dijitalizasaun, partikularmente direitu ba espresaun no informasaun,” Monteiro observa. “Vitál mós atu rekoñese katak direitu ba espresaun dalaruma bele uza sala hodi viola ema seluk nia direitu umanu. Nune’e, estadu tenke asegura katak lei sira, inklui sira ne’ebé aborda krime sibernétiku, elabora ho di’ak no efetivu.”
Monteiro subliña katak direitu dijitál sira maka aspetu fundamentál ida hosi direitus umanus, hodi hateten, “Diskute direitu dijitál sira maka inerentemente kona-ba diskute direitus umanus sira.” Nia subliña importánsia atu asegura ema hotu nia abilidade atu asesu ba informasaun no plataforma dijitál sira hanesan elementu prinsipál ida ba direitu sira-ne’e.
Durante treinamentu loron tolu, partisipante sira envolve ho tópiku oioin, inklui:
– Direitu atu asesu no uza komputadór no aparellu eletróniku sira seluk
– Direitu atu asesu no uza konteúdu dijitál
– Direitu atu kria no fahe mídia dijitál
– Direitu ba privasidade iha komunidade dijitál
– Direitu atu espresa opiniaun ho livre
– Direitu atu relata hahalok sira ne’ebé la apropriadu hanesan bullying, diskursu ódiu, asédiu seksuál online, no dezinformasaun
Organiza husi ITP-TL, treinamentu ne’e hanesan parte ida husi sira nia esforsu kontinua nu’udar organizasaun sosiedade sivíl ne’ebé dedika ba peskiza, kapasitasaun, no advokasia iha direitu dijitál, liberdade internet, no teknolojia nakloke iha Timor-Leste.
Eventu ne’e hetan partisipasaun maka’as husi organizasaun sosiedade sivíl, mídia, universidade, grupu komunidade, no instituisaun públika, hotu-hotu kontribui ba diskusaun kona-ba liberdade internet no direitu dijitál iha Timor-Leste.
This post is also available in: English