Dili 14 Outubru 2024, Provedór-Adjuntu ba Boa Governasaun Rigoberto Monteiro partisipa nu’udar oradór iha semináriu nasionál ho títulu “Eviksaun no Normalizasaun Sidade: Perspetiva Polítika, Impaktu Sosiál, no Dezenvolvimentu Sustentável.” Eventu ne’e organiza husi Departamentu Sosiolojia iha Fakuldade Siénsia Sosiál (FCS) Universidade Nasionál Timor Lorosa’e (UNTL).
Monteiro elojia estudante sira hosi Departamentu Sosiolojia nian ba sira nia inisiativa hodi organiza debate importante ida-ne’e, hodi destaka nesesidade ba estudante universitáriu sira atu envolve iha diskusaun sira kona-ba polítika públika.
“Ha’u hakarak hato’o ha’u nia agradesimentu ba Departamentu Sosiolojia UNTL ne’ebé promove ona diskusaun sira hanesan ne’e. Ne’e krusiál tebes atu ita aborda asuntu polítika públika sira lahó ezitasaun,” Monteiro afirma durante nia diskursu iha FCS-UNTL.
Nia subliña relevánsia semináriu nian ba tópiku despeju administrativu, hodi nota katak enkuantu lei barak maka regula prosesu despeju iha Timor-Leste, governu tenke konsidera mós impaktu sosiál sira hosi desizaun sira-ne’e. “Husi perspetiva polítika, importante tebes atu rekoñese implikasaun sira hosi despeju ba direitus umanus,” nia hatete.
Monteiro husu atu halo reavaliasaun ba polítika públika sira ne’ebé la fó prioridade ba direitus umanus, hodi afirma katak diskusaun sira hanesan ne’e esensiál hodi fó hanoin ba governu kona-ba konsekuénsia signifikativu sira hosi nia desizaun sira.
Nia hatutan tan katak enkuantu diskusaun komunitária sira bele lori ba mudansa sira iha polítika sira ne’ebé estabelese ona, nesesidade sira populasaun nian tenke sempre tau uluk. “Ema hotu hakarak sidade ida ne’ebé moos, maibé ita tenke hanoin katak moris-di’ak ita-nia povu nian maka importante liu,” nia esplika.
Adisionalmente, nia destaka importánsia hosi koordenasaun esforsu sira entre ministériu oioin hodi evita sobrepozisaun no klarifika responsabilidade sira, partikularmente kona-ba Sekretáriu Estadu ba Asuntu Toponímia no Organizasaun Urbana (SEATOU) no munisípiu lokál sira. “Koordenasaun ne’ebé efetivu maka krusiál atu prevene violasaun direitus umanus,” Monteiro konklui.
Semináriu ne’e hala’o iha Salaun Auditoria FCS-UNTL no konta ho oradór sira hosi SEATOU, Dekanu FCS, Diretór Departamentu Sosiolojia, no reprezentante sira hosi grupu advokasia rai oioin ne’ebé asosiadu ho FCS UNTL.
This post is also available in: English