Provedoria dos Direitos Humanos e Justiça (PDHJ) selebra marku signifikativu ida ho rekomendasaun hosi Sub-Komité ba Akreditasaun (SCA) hosi Aliansa Globál Instituisaun Nasionál sira Direitus Umanus nian (GANHRI) hodi akredita filafali ho estatutu “A”. Elojia ida ne’e refleta PDHJ nia kompromisu ne’ebé metin hodi promove no proteje direitus umanus iha Timor-Leste.
SCA nia rekomendasaun ne’e halo durante nia sesaun sira ne’ebé hala’o hosi 1 to’o 3 outubru no 14 to’o 18 outubru 2024. Iha karta ida hodi Sekretariadu GANHRI nia naran, SCA subliña rekomendasaun estatutu akreditasaun nian no fornese relatóriu ida ne’ebé fó sai ninia deskobrimentu sira.
SCA elojia PDHJ ba ninia esforsu proativu, partikularmente iha reforsu resposta ba violénsia bazeia ba jéneru (VBJ), haburas parseria robustu ho organizasaun sosiedade sivíl (CSOs), no hasa’e responsabilizasaun iha militár no polísia nia laran. Rekomendasaun ida-ne’e la’ós de’it afirma PDHJ nia impaktu maibé destaka mós ninia dedikasaun atu aliña ho padraun internasionál direitus umanus nian.
Área xave sira rekoñesimentu nian inklui:
1. Kompromisu ba Lideransa Inkluzivu: SCA nota importánsia transparénsia iha selesaun ba Provedór no enkoraja PDHJ atu halo advokasia ba prosesu ida ne ebé inkluzivu liu ne ebé envolve sosiedade sivíl, hodi reflete kompromisu forte ba prinsípiu demokrátiku.
2. Progresu iha Reprezentasaun Jéneru: Ho reprezentasaun feto iha knaar jestaun ne’ebé sa’e ba 59%, PDHJ hakat ba paridade jéneru, hatudu ezemplu louvavel ba instituisaun sira seluk.
3. Implementasaun Efikaz ba Rekomendasaun sira: PDHJ implementa ona ho susesu rekomendasaun lubuk ida hosi 2018 to’o 2022, hodi hatudu nia efikásia iha advokasia ba direitus umanus no garante responsabilizasaun.
4. Advokasia ba Autonomia Finanseira: SCA nia rekoñesimentu kona-ba nesesidade ba independénsia finanseira reforsa PDHJ nia advokasia kontínua ba finansiamentu adekuadu, hodi permite nia atu kontinua nia serbisu vital lahó limitasaun esterna.
PDHJ sente orgullu ho realizasaun ida ne’e no haree SCA nia rekomendasaun hanesan validasaun ba ninia servisu maka’as no dedikasaun ba direitus umanus. Instituisaun ne’e iha nafatin kompromisu atu haree ba área sira ne’ebé SCA destaka no hein atu hametin liután ninia knaar nu’udar kampiaun ba direitus umanus iha Timor-Leste.
This post is also available in: English