Dili, 16 Jullu 2025 – Nu’udar parte ida husi esforsu nasionál atu hametin governasaun setór públiku, Provedoria Direitus Umanus no Justisa (PDHJ) realiza sesaun diseminasaun kona-ba prinsípiu governasaun di’ak ba pesoál Institútu Apoiu Dezenvolvimentu Emprezariál (IADE). Sesaun ne’ebé hala’o iha Tersa-Feira ne’e iha Salaun IADE, lidera husi Sekretáriu Ezekutivu PDHJ, Ambrosio Graciano Soares.
Inisiativa ne’e halo parte iha PDHJ nia estratéjia ne’ebé luan liu atu envolve ho instituisaun públika sira no promove prestasaun servisu ne’ebé étika, transparente, no responsabiliza iha Timor-Leste laran tomak.
Ko’alia lori Provedór nia naran, Soares agradese ba IADE ne’ebé hola inisiativa hodi konvida PDHJ. “Lori Provedoria Direitus Humanus no Justisa nia naran, ha’u agradese tebes ba IADE ba sira nia inisiativa hodi konvida PDHJ ko’alia kona-ba tópiku governasaun di’ak. Hametin instituisaun públika nu’udar responsabilidade ita hotu nian, no ida ne’e dalan ida ne’ebé ita servisu hamutuk hodi serbí ita-nia nasaun di’ak liu,” nia dehan.
Nia nota liután katak PDHJ planeia ona sesaun formasaun lubuk ida ba instituisaun públika sira liuhosi liña ministeriál sira hodi hasa’e komprensaun no prátika prinsípiu governasaun di’ak entre funsionáriu públiku sira.
Entretantu, Diretór Ezekutivu Interinu IADE, Januario Patricio Barbosa, mós hato’o apresiasaun ba PDHJ nia disponibilidade. “Ami agradese ba PDHJ ba sira nia vontade atu kolabora no fahe sira nia koñesementu ho ami nia funsionariu sira,” nia hateten.
Funsionáriu IADE hamutuk na’in 40 mak partisipa iha sesaun ne’e, ne’ebé fó énfaze ba valór governasaun xave sira hanesan transparénsia, partisipasaun, responsabilizasaun, no estadu direitu.
This post is also available in: English