RAEOA– iha loron 5 to’o 8 fulan Setembru 2016, Provedoria dos Direitus Umanus no Justisa (PDHJ), Inspesaun Jeral Estadu (IJE), Comisaun Anti Corupsaun (CAC), servisu hamutuk ho Ministério Saúde (MS) fó treinamentu ba pesoal saúde sira iha Rejiaun Administrativa Especial Oe-cusse Ambeno.
Secretaria Rejiaun ba asuntu Saúde, Sra. Lusia Taeki iha abertura ba atividade ne’e hateten, Ministério Saúde establese akordu servisu kooperasaun entre instituisaun 3 ne’e iha tinan 2015 no renova hikas akordu ne’e iha tinan 2016, atu nune’e bele eleva koñsimentu pesoal saúde sira konaba knaár husi instituisaun ida-idak, liu-liu atu kapasita no hasa’e koñesimentu funsionarius públiku iha área saúde hodi promove governasaun di’ak.
Sra. Lusia hatetn ba partisipantes sira katak, saúde rejiaonal la’os haketak a’an husi Ministério Saúde maibe ida deit so deit administrasaun mak ketak maib matadalan, estratejia ne’e saúde rejional persiza nafatin tulun husi saúde nasional.
Iha oporunidade ne’e, Secretaria Rejional ba asuntu saúde ne’e, husu ba partisipantes sira ne’ebé atu tuir treinamentu ne’e, tenki tuir ho ceriadade no aproveita oportunidade ida ne’e ho diak, atu nune’e fila fali ba servisu fatin bele lori netik bukae oan ruma ba servisu fatin.
Iha fatin hanesan, Diretora Jeral Ministério Saúde, Sra. Odete Veigas hateten, Ministério Saúde agradese ba instituisaun PDHJ, IJE no CAC , ne’ebé fó treinamentu ba chefe saúde iha rejiaun Oe-cusse, tanba treinamentu ne’e importante teb-tebes atu habelar informasaun importante ba ita nuúdar lideransa.
“Ita hare ba esperiensia ida ne’e, bele hatudu mos ba ita katak hirarquimente ita tenke tuir prosedimentu tanba buat sira ne’e iha fatin maibe dala barak mós ita la’o la tuir buat ne’ebé los, Diretora dehan”.
Direitora esplika ba partisipantes sira katak, governasaun di’ak ne’e papel importante ida ba ita hanesan funsionáriu públiku nia knaár maibe responsabilidade ne’e diferente entaun enkontru ne’e fó liu ba lideransa sira tanba sira mak hola responsabilidade iha ita nia seksaun.
Atividade treinamentu konjunta ne’e realiza iha salaun armazen Servisu Saúde RAEOA ho tema “Kapasita no Hasa’e Koñesimentu Funsionáriu Públiku iha area Saúde hodi Promove Governasaun Di’ak”. No partisipantes mak parteira, enfermeiro/a, medico, responsabel farmasia, responsabel logsitika no chefe sentru saúde husi Postu Administrativa Pasabe, Oesilo no Nitibe.