Dili – Iha loron 17 Abril 2017, Instituisaun Quadrilateral entre PDHJ, CAC, IJE no CFP realiza atividade workshop ka fahe informasaun kona-ba oinsa atu promove no proteje direitus umanus, prevene no kombate korupsaun iha servisu administrasaun publika ba Direitores Jerais, Inspetóres, Diretores Nasionais, Diretores Rejionais, Xefi Departamentu no Xefi Seksaun sira no funsionáriu públiku iha Ministério Solidariedade Social (MSS).
Provedor Dr. Silverio Pinto Baptista iha abertura hateten katak, papel kargu Diresaun no Xefia sira iha funsaun publika importante tenki iha koñesimentu kona-ba prosesu governasaun di’ak, violasaun direitus umanus no mos aktus violasaun sira seluk.
Provedor hatutan katak, aktu violasaun direitus umanus, la’os liu husi torturasaun de’it, maibé iha parte MSS, PDHJ simu keixa barak husi komunidade ne’ebé maka lamenta kona-ba tratamentu no rekolla dadus kona-ba bolsa de mãe, idozus no seluk tan.
“Oras ne’e iha prosesu barak maka la’o, iha Inspesaun Geral do Estadu, no balun to’o ona iha Comisaun Anti Corrupsaun (CAC). Tan ne’e, tuir ami nia hare katak importante tebes, ita tenke partilha informasaun hodi prevene aktus korupsaun, atu nune’e iha futuru labele akontese iha funsionariu publikus sira ne’ebé servisu iha administrasaun públiku”, dehan Provedor
Provedor hatutan tan katak,wainhira kargu xefia sira iha terenu hala’o kna’ar la ho di’ak, komunidade iha direitu hato’o keixa ba PDHJ, ho nia intensaun fó hanoin sira atu labele hare komunidade sira hanesan inimigu.
Iha fatin hanesan, Prezidente Komisun Funsaun Publiku (KFP) Prof. Dr. Faustino Cardoso Gomes, hateten katak, funsionriu públiku ne’ebé hetan kargu Diresaun no xefia iha funsaun públiku importante tebes tenki hatene kona-ba nia kna’ar.
Prezidente reforsa katak, hanesan kargu xefia importante tebes tenke iha integridade. Tan intgridade sai mós sasukat ba progresu servisu ba kada kargu xefia hodi lidera instituisaun no departementu ne’ebé sira lidera.
“Bainhira kargu xefia iha ona integridade, hanoin tentasaun sei la dumina imi nia hanoin, tan hau hanoin kapasitasaun sira hanesan ne’e, importante tebes, nune’e bele fó hanoin bei-beik ba ita hotu hodi kompriende, no evita an husi aktu krimi sira seluk,”afirma Prezidente KFP.