Dili : Provedoria Direitus Humanus no Justisa (PDHJ) iha 29/08/2019,simu vizita espesiál delegasaun husi Victoria, Australia ne’ebé xefia husi Josh Bull MP nu’udar Sekretáriu Parlamentar ba Assuntu Relasaun Multikultural ka Parliamentary Secretary for Multicultural Affairs, nu’udar mós Vise Ministru reprezenta Ministru Richard Wynne, akompaña mós husi Deputy Secretary, Terry Garwood, Shannon Farley nu’udar Josh Bull’s Advisor no Director Interntional Affairs, Nick Oats.
Delegasaun ne’ebé kompostu husi membrus nain haat ne’e, simu husi Provedor Adjuntu ba Boa Governasaun, Miguel Pereira de Carvalho no Provedora Adjunta ba Direitus Umanu, Benícia Eriana Magno liu husi tradisaun tara Tais.
Iha biban ida ne’e, Adjuntu nain rua halo briefing ba delegasaun konaba knar no kompotensia PDHJ nian ne’ebé regula iha artigu 27 Konstituisaun RDTL ne’ebé hateten, PDHJ nu’udar órgaun independente ida-ne’ebé iha knaar atu haree no buka hatán sidadaun sira-nia problema hasoru podér públiku, hodi haree loloos hahalok sira-ne’e tuir duni lei, no halo prevensaun no hahú prosesu tomak hodi haburas fali justisa. Alende ne’e knar PDHJ nian defini iha Estatutu Lei nú. 7/2004 no Decretu Lei nú 31/2016.
Entretantu poder PDHJ nian tuir defini iha lei sira ne’e maka hanesan; poder simu keixa, halo investigasaun ba indisius sira ne’ebé komete husi poder públiku, poder atu deside hodi loke prosesu ou lae, poder atu asesu ba dokumentus sira, no poder sira seluk tan, hafoin hato’o relatoriu ba Parlamentu Nasionál no rekomendasaun sira ba ministérius ka instituisaun relevantes ba keixas.
Husi parte seluk, Sekretáriu Parlamentar ba Assuntu Relasaun Multikultural, Sr Josh Bull MP informa katak, nia reprezenta governu Vitoria mai iha Timor-Leste hodi hasoru malu ho lider sira inklui kargu xefia iha PDHJ hodi asegura kooperasaun entre nasaun rua. Nia mós husi konaba keixa hirak ne’ebé sidadaun sira aprezenta mai iha PDHJ, maioria keixa hasoru sé, Provedora Adjunta ba Direitus Umanus, Benícia Eriana Magno informa katak, keixa barak liu hasoru membrus PNTL. Maske nune’e, Adjunta hateten, númerus violasaun direitus umanus ne’ebé komete husi membrus polisia sira hahú menus daudaun ona, tanba membrus PNTL sira maioria intende ona konaba saida maka Direitus Umanus, depois de partisipa iha formasaun ne’ebé organiza husi PDHJ.