Iha loron 8 fulan Agostu tinan 2024, Provedór Direitus Umanus no Justisa, Virgílio da Silva Guterres ‘Lamukan’, partisipa iha komemorasaun aniversáriu fundasaun Asosiasaun Nasaun sira Sudeste Aziátiku nian (ASEAN). Eventu ne’e organiza husi Ministériu Negósiu Estranjeiru no Kooperasaun Timor-Leste no hala’o iha Dili.
Serimónia ne’e hetan partisipasaun husi figura notável sira inklui Prezidente Repúblika José Ramos-Horta, Prezidente Parlamentu Nasionál Fernanda Lay, Primeiru-Ministru Kay Rala Xanana Gusmão, Prezidente Tribunál Rekursu Doelindo dos Santos, no Embaixadór Indonézia Octo Dorinos Manik, ne’ebé hala’o kna’ar mós nu’udar Xefe Misaun ASEAN ni’an iha Dili. Marka mós prezensa iha eventu ne’e embaixadór sira, diplomata sira, no dignitáriu sira seluk.
Funda iha loron 8 fulan Agostu tinan 1967, ASEAN harii atu promove estabilidade rejionál, kreximentu ekonómiku, no interkámbiu kulturál entre ninia estadu membru sira. Organizasaun ne’e hala’o ona papél signifikativu ida hodi haburas kooperasaun no diálogu iha Sudeste Aziátiku nia laran. Enkuantu Timor-Leste nia envolvimentu ho ASEAN buras, komemorasaun ne’e destaka importánsia husi parseria rejionál sira ne’e hodi avansa direitus umanus no justisa.
Provedoria ba Direitus Umanus no Justisa nia partisipasaun subliña kompromisu ida ba kooperasaun rejionál no objetivu sira ne’ebé fahe husi ASEAN hodi promove direitus umanus no valór demokrátiku sira.
This post is also available in: English