Dili: Lideres másimus husi Provedoria dos Direitos Humanos e Justiça (PDHJ), Comissão da Função Pública (CFP), Comissão Anti-Corrupção (CAC), Inspecção Gerál do Estado (IGE) halo apresiasaun finál no asina estensaun dokumentu servisu konaba Prevensaun no Kombate Korrupsaun atu Promove Governasaun Di’ak no Proteze Direitus Umanus iha Administrasaun Públika.
“Ohin, ami hamutuk iha ne’e hodi halo asinatura ba dokumentu Termus de Intendementu, nu’udar estensaun ida ba dokumentu ho natureza hanesan, ne’ebé maka instituisaun haat asina tiha ona iha tinan haat ba kotuk”, dehan Prezidente CFP, Sr. Faustino Cardoso Gomes iha konferénsia-imprensa depoisde remata asina termus de intendementu, iha salaun enkontru CFP Matadoru Dili, 13/11/2019.
Nia hatutan, iha termus de intendementu ne’e inklui sasan sira hanesan atu halo balansu ba atividade sira ne’ebé hala’o ona durante tinan haat ba kotuk, nomos hanoin krítika sira atu oinsa asegura efikasia ba asaun konjuntu hirak ne’ebé hala’o durante ne’e.
Alende ne’e, haree mós ba sujestaun sira atu asegura di’ak liutan funsionamentu tékniku ne’ebé sei tau iha dokumentu operasionál ida hanaran Standard Operational Procedure (SOP) hodi sai nu’udar matadalan ida ba instituisaun haat hodi hala’o ho didi’ak konteúdu husi dokumentu de intendementu ida ne’e.
Liutan Prezidente CFP ne’e hateten, iha tempu badak ekipa tékniku sira sei hala’o servisu liu husi pontu vokál instituisaun ida-idak ninian, atu oinsa bele hamosu out put liuhusi SOP bazeia ba termus de intendementu ne’e.
Iha termus de intendementu ne’e mós, iha klauzula lubun ida ne’ebé ko’alia konaba asaun konjunta ida ne’e, tanba iha klauzula balu fó espasu ba asaun konjunta iha ámbitu inspesaun konjunta, iha klauzula konaba servisu desiminasaun, peskiza, vizita surpreza, komforme planu husi instituisaun haat ne’e, hateten Prezidente CFP ne’e.
Termus de intendementu ne’e nia validade ba tinan haat 2019-2023, hanesan ho esperiensia tinan haat ba kotuk nian. Tan ne’e, agora instituisaun haat ne’e hamutuk halo renovasaun ho aditamentu balu ba konteudu, bazeia ba lisaun aprendidas sira ne’ebé durante ne’e instituisaun haat hetan, nomos vizaun foun bazeia ba planu foun. Tanba ne’e, aditamentu ba konteúdu termus de intendementu ne’e hetan aumentu husi klauzula no sub-pontu sira balu, katak Prezidente CFP ne’e.