Dili– Iha loron 19 to’o 20 fulan Marsu tinan 2013, Provedoria dos Direitos Humanos e Justiça (PDHJ), sei organiza Technical Working Group (TWG) meeting ba South East Asia National Human Rights Institution Forum (SEANF) iha hotel Garden Beach Dili-Timor-Leste.
Dr. Sebastião Dias Ximenes, Provedor hateten, objetivu husi enkontru internasional ne’e atu “follow-up” isu direitos humanos ne’ebe akontese iha nasaun membru ida-idak nian.
Nasaun sira ne’ebé maka sei partisipa iha enkontru SEANF ne’e maka nasaun sira ne’ebé maka sai ona membros permanente ba SEANF maka hanesan Filipina, Malaysia, Indonesia, Myanmar, Thailandia no Timor-Leste.
Provedor mos rekuiñese katak, maske nasaun Timor-Leste sei iha prosesu nia laran atu sai membru ba ASEAN, maibe PDHJ iha tinan 2010 sai ona membrus ba South East Asia National Human Rights Institution Forum (SEANF) nian iha nasaun Sudeste Aziátiku.
Provedoria dos Direitos Humanos e Justiça (PDHJ), nu’udar órgaun independente ne’ebe iha kna’ar atu proteje no promove direitus humanus liu husi nia atividade monitorizasaun, investigasaun no promosaun no edukasaun direitus humanus.
PDHJ agora dadaun sai Presidente ba Forum South East Asia National Human Rights, tanba ne’e PDHJ sai uma nain ba Technical Working Group no mos sei sai uma nain ba Annual Meeting SEANF nian iha fulan Setembru 2013.
Nasaun membros sira ne’e, sei to’o Dili iha loron 18 Marsu no sei fila fali ba sira nia nasaun idak-idak nian iha loron 21 Marsu 2013. No oras ne’e dadaun PDHJ halo hela preparativos ba enkontru ne’e.