𝐽𝑎𝑘𝑎𝑟𝑡𝑎 𝐼𝑛𝑑𝑜𝑛𝑒́𝑧𝑖𝑎, 19-22 𝑚𝑎𝑖𝑢 2024 – Provedór-Adjuntu ba área Governasaun Di’ak, Rigoberto Monteiro, akompaña hosi ofisiál Diresaun Promosaun-PDHJ, Eduarda Peregrina, Diretór Jerál Polítika no Justisa hosi Ministériu Justisa, Honório Aureliano Soares Magalhães no Diretór Nasionál Assuntus Polítiku no Seguransa, Sidónio Jorge Martins partisipa no sai hanesan observadór iha enkontru ba da-39, The ASEAN Intergovernmental Commission on Human Rights (AICHR) iha Kuartel Jerál Sekretariadu ASEAN ni’an iha Jakarta-Indonézia, hahú hosi loron 19-22 maiu 2024.
Enkontru AICHR ba dala 39 ne’e loke ofisialmente hosi Embaixadór Yong Chanthalangsy reprezentante Lao PDR ba AICHR. Iha nia diskursu makloke nia haktuir katak sorumutu ne’e hanesan oportunidade di’ak ba membru sira hodi diskute kle’an kona-bá oinsá atu haforsa promosaun no mós protesaun direitus umanus, liu husi prioritizasaun ba programa no ajenda sira iha tinan 2025.
Reuniaun ne’e atualiza kona-ba dezenvolvimentu resente iha rejiaun ne’e, inklui lei no regulamentu foun sira no direitus umanus. Allende ne’e diskute kona-bá implementasaun husi prioridade no programa sira AICHR-ni’an ho foku ba direitu ba ema ho defisiénsia, direitu feto no labarik, dezinformasaun, direitus umanus no polísiamentu ASEAN, negósiu no direitus umanus. AICHR mós halo diskusaun kona-ba medida sira ba haforsa governasaun ba programa no atividade sira AICHR ni’an, preparasaun Planu Traballu Kinkenál 2026-2030, ne’ebé iha aliñamentu vizaun komunitáriu ASEAN 2045 no nia planu estratéjiku.
Iha loron ikus husi enkontru AICHR-nian, Adjuntu-Provedór, Rigoberto Monteiro, hanesan xefe delegasaun no reprezenta Estadu Timor-Leste, hato’o nia apresiasaun no orgullu, tanba Timor-Leste bele hola parte iha sorumutu ida ne’e nu’udar observadór.
“Nudar membru observadór, ami kontinua hola parte iha diskusaun hotu relasiona ho progresu atividade AICHR-ni’an, inklui prioridade sira iha pasadu no mós ajenda iha oin mai. Hein katak, esperiensia hirak ne’e sei konsidera nudar konrtibuisaun pozitivu ba ami nia roadmap ba membru permanente ASEAN-ni’an.”
Monteiro mós aprezenta katak, situasaun Direitus Umanus iha Timor-Leste iha progresu ne’ebé signifikativu no refleta ba nível ne’ebé a’as iha demokrasia. “Ami nia índise ba liberdade imprensa no espresaun a’as liu iha rejiaun Sudeste Aziátiku, maske nune’e ami nafatin iha vijilánsia hodi asegura direitu fundamentál ba ami-nia sidadaun sira.” Nia akresenta, ba oin, Timor-Leste presiza dezenvolve mekanizmu no identifika
indikadores sira, hodi sukat dezenvolvimentu direitus umanus iha Timor-Leste.
Partisipa iha sorumutu ne’e reprezentante AICHR husi nasaun Malaizia, Brunei Darusallam, Cambodia, Indonézia, Myanmar, Filipina, Sekretariadu ASEAN, Tailandia, Singapura, Vietnam, Lao PDR no Timor-Leste hanesan Observadór.
This post is also available in: English