Dili : ProvedoraDireitus Umanus no Justisa Sra. Jesuina Maria Ferreira Gomes, MPA. iha loron 18/09/2019, halo vizita kortejia ba Kuartel Jerál Forsa Defeza Timor-Leste, hodi hasoru malu ho Ministru Defeza, Filomino Paixão.
Objetivu husi vizita ida ne’e, atu hametin liutan kooperasaun institusionál Provedoria Direitus Humanus no Justisa (PDHJ), ho instituisaun Falintil-Forsa Defeza Timor-Leste (F-FDTL), aumesmu tempu ho instituisaun Polisia Nasionál Timor-Leste (PNTL), tanba Ministru Defeza asumi mós pasta nu’udar Ministru Interior Interinu.
Alende atu hametin kooperasaun institusionál, vizita provedora nian ne’ebé akompaña husi Xefe Gabinete, Sr. Silvino Saldanha Pereira ne’e espesiálmente atu komvida Ministru Defeza no Ministru Interior Interinu, hodi halo abertura ba programa Semináriu Nasionál ne’ebé PDHJ liu husi kooperasaun ho Unidade Assesoria Direitus Umanus ONU nian, sei realiza ba Komandantes PNTL husi kada munisipius, iha loron 24/09/2019.
Alende sei partisipa husi Komandantes PNTL Munisipius, Semináriu Nasionál ho tópiku “Hametin Protesaun Direitus Umanus ba PNTL” ne’e sei partisipa mós husi seksaun unidade polisial lima (5) mak hanesan Unidade Polisia Fronteira (UPF), Unidade Polisia Marítima (UPM), Unidade Seguransa Polisia (USP), Sentru Formasaun Polisia, (SFP), Inspesaun Jerál da Polisia, ho Departementu Justisa PNTL nian.
Semináriu Nasionál ne’e sei termina ho asina hamutuk kompromisiu ida ne’ebé hateten katak, PNTL sei respeita nafatin direitus umanus, sei kontinua halo formasaun, sei asegura protesaun ba direitus sidadaun sira nian.
Inisiativa halo semináriu nasionál ne’e bazeia mós ba mandatu Konstitusionál PDHJ nian ne’ebé defini iha artigu 27 Konstituisaun RDTL katak, PDHJ nu’udar órgaun independente ida-ne’ebé iha knaar atu haree no buka hatán sidadaun sira-nia problema hasoru podér públiku, hodi haree loloos hahalok sira-ne’e tuir duni lei, no halo prevensaun no hahú prosesu tomak hodi haburas fali justisa.
Hanesan defini mós iha vizaun PDHJ nian atu proteze direitus humanus, hametin integridade no promove governasaun di’ak iha Timor-Leste, nomos misaun PDHJ nian maka atu halo edukasaun, promove kooperasaun, rezolusaun, halo investigasaun, peskiza no monitorizasaun.