Dili, 29 jullu 2024 –Provedóra-Adjunta ba Direitus Umanus, Maria Marilia da Costa, loke sesaun formasaun kona-ba “Ekosistema Informasaun no Teknolojia iha Timor-Leste,” ne’ebé organiza husi Asosiasaun Progresiva Teknolojia Informasaun Timor-Leste (ITP-TL). Eventu ne’e hala’o iha Salaun Fundação Oriente, Dili.
Iha nia diskursu, Provedóra-Adjunta subliña nesesidade krítiku atu komprende direitu dijitál sira no protesaun dadus. “Ho númeru dezafiu online ne’ebé aumenta subliña nesesidade krítiku ba protesaun sira ne’ebé efetivu ba ita-nia dadus pesoál no interasaun dijitál sira,” nia hatete. Nia mós asentua Provedoria nia knaar iha advokasia no salvaguarda direitu dijitál sira nu’udar parte ida husi misaun atu tane aas direitus umanus iha Timor-Leste.
Nia enfatiza oinsá avansu sira iha teknolojia transforma ona direitus umanus fundamentál sira, “Direitu dijitál sira, inklui privasidade, liberdade espresaun nian, no asesu ba informasaun, maka parte integrante ba direitus umanus iha era dijitál.” Nia mós ko’alia kona-ba dezafiu dezigualdade dijitál iha Timor-Leste, ne’ebé ema barak hasoru barreira atu hetan asesu ba teknolojia no rekursu dijitál sira.
Provedóra-Adjunta Marilia husu atu kontinua progresu iha lejislasaun dijitál. “Enkuantu ita halo ona avansu ho lei sira hanesan Dekretu Lei Telekomunikasaun nian no Lei Direitu Autór nian, ita presiza nafatin lejislasaun protesaun dadus nian ne’ebé komprensivu”, nia hatete. Nia mós salienta importánsia atu hadi’a literasia dijitál, “Hasa’e abilidade dijitál ne’e importante tebes atu fó kbiit ba ema ida-idak no proteje sira hosi risku online sira.”
Atu taka, Provedóra-Adjunta enkoraja partisipante sira atu partisipa ho ativu iha formasaun refere. “Mai ita serbisu hamutuk hodi tane aas direitu dijitál sira no garante justisa ba ema hotu iha Timor-Leste”, nia hakotu. Formasaun ida ne’e reprezenta pasu signifikativu ida ba hametin direitu dijitál no avansa jestaun teknolojia iha Timor-Leste, hodi loke dalan ba futuru dijitál ne’ebé informadu liu no ekuitativu.
This post is also available in: English