Dili : Hafoin semana ida nia laran hahu husi loron, 11 to’o 15 Jullu 2022, ekipa formador ne’ebé kompostu husi Provedoria dos Direitos Humanos e Justiça (PDHJ), Unidade Asesoria Direitus Umanus (UADU) ho Centru Formasaun Polisia (CFP-PNTL), fasilita ona formasaun kona-ba Knaar PNTL no Direitus Umanus ba membru PNTL nain 21 husi Quartel Geral iha Dili, ikus mai loron, 15 Jullu 2022 ekipa konsege finaliza sira nia prosesu formasaun ho fahe sertifikadu ba formandu sira.
Reprejenta Provedora Chefe Gabinete, Silvino Saldanha Pereira iha nia intervensaun hateten, nia espera ho formasaun ida ne’e, sai hanesan referensia ida ne’ebé bele aumenta formandu sira nia kuñesementu iha knaar lorloron nian ne’ebé liga ho direitus umanus.
“Treinamentu ne’e sai hanesan referensia ida nebe bele aumenta ita bo’ot sira nia kuñesementu iha direitus umanus nian, nune’e bainhira fila ba ita bot sira nia fatin servisu bele implementa iha ne’ebá,”hateten, Chefe Gabinete, Silvino Saldanha Pereira, iha Centru Formasaun Polisia (CFP-PNTL Comoro, bainhira ensera atividade Formasaun Direitus Umanus.
Nia hatutan, PDHJ mós orgullu ho Centru Formasaun Polisia (CFP-PNTL), ne’ebé mak kopera diak tebes ho PDHJ liu-liu iha área formasaun nian, no formasaun direitus umanus ne’e rasik sei la termina deit iha dili maibe, sei kontinua habelar mós ba membru PNTL sira iha Munisipiu seluk.
Iha fatin hanesan, Asesora Claudia husi Unidade Asesoria Direitus Umanus (UADU) m’os akresenta katak, nia espera formandu sira bele iha oportunidade atu pratika kona-ba formasaun sira ne’ebé relasaun ho Direitus Umanus nian.
Tanba PNTL mak entidade principal hpodi hametin lei iha nasaun Timor-Leste no salva guarda sidadaun sira nia direitu tuir lei n’ebé iha ona.
Nia hatutan, UADU kontenti suporta programa direitus umanus ne’ebé lao ona durante tinan hira nia laran no ONU Timor-Leste iha vontade atu kontinua apoiu formasaun ida ne’e.
Maske nune’e Chefe Gabinete, Centru Formasaun Polisia (CFP-PNTL), mós haktuir sira nia parte agradese tebes ho formasaun ne’e no sira sei kontinua kopera hodi fó apoiu ba iha formasaun ida ne’e nune’e bele aumenta liu tan membru PNTL sira nia kuinesementu hodi respeita sidadaun sira nia direitus.