Manila, 10–12 marsu 2026 – Reprezentante sira hosi Provedoria Direitus Umanus no Justisa (PDHJ) Ambrosio Graciano Soares, Teresinha Ximenes, Olga Vilanova Sequeira, no Margarida dos Santos, hola parte iha Enkontru Ofisiál Superiór sira-nian (SOM) dahuluk hosi Fórum Provedória Sudeste Aziátiku (SEAOF) hala’o iha Manila, Filipina.
Durante enkontru loron tolu ne’e, delegasaun PDHJ, hamutuk ho membru SEAOF sira seluk, envolve ativamente iha diskusaun kona-ba Fórum nia dokumentu fundamentál sira. Partisipante sira avalia programa formasaun inisiál, haree filafali deskobrimentu preliminár sira hosi estudu komparativu, no kontribui ba dezenvolvimentu planu estratéjiku SEAOF nian.
Diskusaun sira foka ba definisaun diresaun estratéjiku Fórum nian no hadi’a ninia prioridade prinsipál sira, hodi konsidera rezultadu dahuluk sira hosi estudu komparativu. Membru sira delibera kona-ba atu mantein área foku sira ne’ebé eziste ka fó prioridade ba oportunidade foun sira ba kolaborasaun rejionál. Enkontru ne’e mós inklui ezersísiu sira vizaun estratéjiku nian ne’ebé ho objetivu atu forma SEAOF nia identidade, artikula vizaun ida ne’ebé partillada no identifika inisiativa potensiál sira ba inkluzaun iha planu estratéjiku.
Sesaun ne’e permite atualizasaun no refinamentu sira ba dokumentu xave no akordu anteriór sira, inkorpora hanoin foun ne’ebé hetan durante prosesu planeamentu. SOM mós trasa pasu sira tuirmai imediatu iha preparasaun ba Enkontru Diretór/Líder sira SEAOF nian ne’ebé sei mai, ne’ebé marka ona ba Juñu 2026.
Hanesan parte ida hosi programa, membru sira SEAOF nian hola parte iha sesaun vídeo ida iha ne’ebé sira fahe reflesaun sira kona-ba sira nia esperiénsia iha Manila, no mós sira nia perspetiva sira tantu nu’udar reprezentante nasaun nian no nu’udar sidadaun. Membru sira mós hato’o mensajen sira apoiu no kolaborasaun nian ba Provedór Filipina nian iha ninia papél duplu nu’udar Prezidente no nu’udar membru SEAOF seluk.
Fórum Provedór Sudeste Aziátiku (SEAOF) maka plataforma rejionál ida ne’ebé halibur instituisaun provedór sira no órgaun keixa públiku sira iha Sudeste Aziátiku tomak. Fórum ne’e hakarak atu hametin mandatu legál sira hosi ninia membru sira, promove lian unifikadu ida kona-ba asuntu interese públiku rejionál sira no dezenvolve mekanizmu koordenadu sira hodi trata keixa públika iha membru nia jurisdisaun sira.
Provedoria Direitus Umanos eno Justisa (PDHJ) Timor-Leste sai hanesan membru pleno SEAOF nian iha loron 7 fulan-novembru tinan 2023, durante Enkontru Líder sira SEAOF nian ne’ebé hala’o iha Yogyakarta, Indonézia.
This post is also available in: English