Dili, 02 Dezembru 2024 – Provedoria dos Direitos Humanos e Justiça (PDHJ) kontinua ho nia programa formasaun regulár direitus umanus ba membru Polísia Militár (PM), ne’ebé foka liu ba direitus umanus no knaar sira aplikasaun lei nian. Treinamentu durante loron lima ne’ebé hala’o husi loron 2 to’o loron 6 fulan Dezembru iha Dili, halo parte husi inisiativa Provedoria nian atu promove direitus umanus iha forsa seguransa Timor-Leste nia laran. Programa ne’e dezeña atu hasa’e komprensaun membru PM nian kona-ba sira-nia responsabilidade tuir lei direitus umanus nasionál no internasionál, hodi garante katak sira tane aas direitu no liberdade indivídu hotu-hotu ne’ebé sira serbí.
Iha lia maklokek, Provedóra-Adjunta ba Direitus Umanus, Maria Marilia da Costa subliña papél krítiku ne’ebé Polísia Militár hala’o hodi salvaguarda direitus umanus no mantein orden públika iha Timor-Leste. Nia nota katak formasaun ne’e mós aliña ho prinsípiu demokrátiku sira nasaun nian, hodi reforsa katak entidade públika hotu-hotu, inklui Polísia Militár, tenke respeita no proteje direitu fundamentál sira ema ida-idak nian. Treinamentu ne’e halo parte iha esforsu ne’ebé la’o hela husi PDHJ atu ekipa tantu Polísia Nasional Timor-Leste (PNTL) no Falintil-Forsa Defeza Timor-Leste (F-FDTL) ho koñesimentu no ferramenta sira ne’ebé presiza atu prevene violasaun direitus umanus, tantu iha rai-laran no durante misaun manutensaun pás internasionál.
Iha sesaun ne’e partisipa mós husi Major Mateus de Jesus, Komandante Unidade Polísia Militár, ne’ebé subliña importánsia formasaun ba membru PM sira. Nia destaka katak komprende direitus umanus no sira nia aplikasaun maka krusiál ba polisiamentu ne’ebé efetivu no ba haburas kultura respeitu no responsabilizasaun iha forsa nia laran. Sesaun ida-ne’e marka kontinuasaun husi série programa edukasaun direitus umanus nian ne’ebé organiza husi PDHJ, ne’ebé la’o ona durante tinan balun nia laran. Ekipa atuál ne’ebé partisipa hamutuk na’in-21, na’in-tolu hosi sira-ne’e feto, no hein atu kontribui maka’as hodi hametin PM nia papél iha tane aas justisa no direitus umanus iha Timor-Leste.
This post is also available in: English