Dili: Loron, 05 Outubro 2023, Provedor de Direitos Humanos e Justiça hamutuk ho Estrutura no funsionárius hotu partisipa iha atividade ‘In House Sharing’ ne’ebé dirije hosi Jestora Treinamentu hosi Ra’es Hadomi Timor Oan (RHTO), Sra. Silvia Soares, iha sala biblioteka, PDHJ, hodi koalia kona-ba knaar ema ho defisiênsia no dezafiu sira.
RHTO kontinua halo advokasia liuhosi atividade treinamentu sira hodi promove nafatin direitu ema ho defisiênsia nian iha âmbitu atu asesu ba oportunidade no inkluzividade ba aspektu dezenvolvimentu nasional nian.
Aleinde ne’e, RHTO kontinua servisu ho parseiru sira hodi kombate diskriminasaun ho forma oi-oin hasoru ema ho defisiênsia sira iha Timor-Leste.
RHTO iha estratéjia sira ba inkluzaun defisiênsia mak hanesan, atu hasae konsiênsia, servisu ho organizasaun ne’ebé reprezenta ema ho defisiênsia, identifika ema ho defisiênsia, hamenus barreira no halo monitorizasaun.