Date, 30-06-2008
Provedor de Direitos Humanos e Justiça (PDHJ) iha loron 27 Juñu 2008 hato’o tiha ona relatoriu anual ba Prezidente Parlamentu Nasionál iha uma fukun Parlamentu Nasional. Relatoriu ne’e sei hato’o ho lian Tetum.
Bazeia ba lei numiru 7/2004 estatutu do Provedor de Direitos Humanos e Justiça (PDHJ) artigu 46 katak, iha loron 30 Fulan-Juñu tinan-tinan Provedór Direitos Humanos no Justiça sei hatada relatoriu ida kompletu kona-ba ninia atividade no inisiativa sira inklui estatístika kona-ba kazu no solusaun sira ne’ebé hetan ona durante tinan ida nia laran haktuir kalendàriu sivíl nian ne’ebé remata iha loron 31 fulan-Dezembru ba Parlamentu Nasional.
“Relatoriu tinan ida ne’e nu’udar relatoriu ba dala tolu. Liu husi relatoriuu ne’e Provedoria dos Direitos Humanos e Justiça hato’o atividades PDHJ nian hahu husi Janeiru 2007 to’o Dezembru 2007. Atividades hirak ne’e hanesan edukasaun no promosaun, treinamentu ba membros F-FDTL, PNTL, funsionariu públikus sira, Sefi Aldeia, Sefi Suku, Xefe do Postu, Administrador distritu sira, monitorizasaun, keixa ne’ebé hato’o husi komunidade, investigasaun no rekomendasaun ba orgauns kompetentes, hateten Provedor Dr. Sebastião Dias Ximenes”.
“Maske iha situasaun difisil hanesan difikuldades ba rekursus humanus no finanseiru PDHJ halo esforsu nafatin atu hari’i kapasidade iha instituisaun laran. Biar nune’e ho neon haksolok tebes hodi hato’o relatoriu ba dala tolu ne’e ba Parlamentu Nasionál. Relatoriu ne’e mós sei fó sai ba públiku atu nune’e públiku bele akompana servisu Provedoria nian ne’ebé hala’o durante tinan 2007 hatutan Dr. Sebastião Dias Ximenes”.
Iha Relatoriu ne’e Provedor hato’o rekomendasaun balun ba Parlamentu Nasionál ho objetivu atu oinsa reforsa knaar PDHJ nian iha futuru hanesan orgaun ne’ebé indepedente. Alien ida ne’e, relatoriu ba dala ida ne’e Provedor hameno ba Parlamentu Nasionál no Governu atu bele implementa rekomendasaun ne’ebé mak PDHJ hato’o ona iha tinan 2006 liu husi nia relatoriu anual maibé seidauk implementa to’o agora.
Iha parte seluk Provedor sente haksolok hodi haree rekomendasaun balun ne’ebé implementa ona ka iha prosesu atu implementa liu husi Provedor nia lia menon iha relatoriu anual tinan 2006.
Relatoriu anual ne’e mos sei tradus ba lian Portugues no Ingles atu fahe ba instituisaun governu nian, instituisaun Istado, organizasaun internasionál, NGO Nasionál no internasional.
Alien de Provedor mós hato’o relatoriu investigasaun no rekomendasaun ba kazus kona-ba mal-administrasaun no korrupsaun ne’ebé hato’o ona ba instituisaun kompetente iha tinan 2007 maibé to’o agora la implementa.
Persiza informasaun kontaktu
Lady Ximenes, Informasaun & Relasaun Públika
No Telemovel 726 1843 ou Telp 333 1071