Date ; 27-02-2012
Dili – Ekipa konjunta ne’ebe kompustu husi funsionariu Provedoria dos Direitos Humanus no Justisa (PDHJ) no reprezentantes husi Organizasaun Naun Governamental (ONG) ne’ebe servisu iha area direitus umanus sei halo monitorizasaun hahu husi 29 Fevereiru 2012 to’o 19 Marsu 2012 iha territoria laran molok eleisaun no eleisaun Prezidensial 2012.
Provedor Interino atual Adjuntu Provedor ba area Governasaun Diak, Dr. Rui Pereira dos Santos hateten katak, objetivu husi monitorizasaun hanesan atu prevene para atu la bele mosu violasaun direitus humanus, atu hametin estadu ninia responsabilidade atu proteje direitus humanus, liu husi monitorizasaun bele mos fo asistensia ba vitima sira no ajuda atu halo reparasaun ba violasaun direitus humanus no mos ofisial monitorizasaun direitus humanus bele promove no defende mudansa bainhira violasaun direitus sai institusionalizadu.
“Iha aktividade monitorizasaun ne’e, PDHJ servisu hamutuk ho parseiru sira ne’ebe servisu ba direitus humanus hanesan ONG The Asia Fundation, MAHEIN, BELUN, JSMP, Asosiasaun HAK, Forum Tau Matan (FTM) no parseiru husi ONG sira seluk ne’ebe mak servisu ba direitus humanus iha Distrito 13”, Hateten Provedor Interino iha konferensia imprensa iha edifisiu PDHJ-Caicoli Dili, Segunda, 27 Fevereiru 2012.
Adjuntu Provedor esplika katak, depois de ofisial monitorizasaun direitus humanus ba halo monitorizasaun iha fatin sira ne’e, ofisial direitus humanus sira sei rekolla informasaun hotu ne’ebe los no metin hodi hakerek iha relatoriu.
Rezultadu husi monitorizasaun ne’e sei fo sai ba publiku sira atu hatene, sekarik iha tempu molok eleisaun ba to’o tempu eleisaun mak iha alegasaun violasaun direitus humanus no iha buat ruma ne’ebe lao la tuir lei ne’ebe iha mak PDHJ sei hato’o ba Tribunal Rekursu antes Tribunal fo sai rezultadu eleisaun ba publiku.
Aktividade monitorizasaun ne’e hetan mos suporta husi finanseiru husi ONG The Asia Fundations ho valor USD. 5.000.00, orsamentu refere aloka ba feé ba monitor husi Distrito 13 no pulsa ba komunikasaun.
Bazeia ba Konstituisaun RDTL Artigu 27, Provedor dos Direitos Humanos e Justiça nu’udar órgaun indepedente ida iha knaar atu haree no buka hatán sidadaun sira-nia problema sakar podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali Justiça.
Presiza Informasaun Kontaktu
Lady Ximenes, Telemovel 7304260
ou Jose Tefa 735 1412 ou 3331071 (Relasaun Públika PDHJ)