Oe-Cusse, 10 Juñu 2020. Ekipa fiskalizador PDHJ nian iha Delegasaun Territorial (DT) Oe-Cusse iha loron 10 Juñu 2020 hala’o observasaun direta ba funsionamentu atendimentu públiku iha Sub. Rejiaun Pante Macassar, Rejiaun Administrativa Especial-Oe-Cusse Ambeno (RAEOA) nota katak ministerios no instituisaun estadu nian hala’o nafatin atendementu ba públiku maibé funsionarios públiku sira-prezensa mak menus iha instituisaun no ministerios balun.
Ekipa Fiskalizadór sira iha RAEOA hala’o observasaun ba institusional no ministeriu sira hanesan Tribunal, Defensória Públiku, Ministériu Públiku, Servisu Rejional Solidariedade Social (SRESS) Gabinete Prezidente Autoridade, Comissão Nacional de Eleiçoes (CNE) no Obras Públicas.
Tuir esplikasaun husi Dirijentes husi Diresaun Rejional Terras no Propriedade (SRPOTC-RAEOA) no Servisu Rejional Solidariedade Social (SRESS-RAEOA) hateten katak, azaun funsinariu sira só servisu de’it iha parte dader no loronkraik la tama servisu ne’e.
Maibé, iha loron fiskalizasaun ne’e, Fiskalizadór sira la konsege halo konfirmasaun ho Kargu Diresoens no Xefias relevante sobre kestaun refere maibé fiskalizadór sira halo de’it observasaun jerál.
Enkuantu, Diretór Rejional Patrimóniu Estadu, esplika ba fiskalizadór PDHJ-DT RAEOA iha loron 15 Juñu 2020 katak, iha diresaun refere funsionáriu públiku sira servisu tuir oras normal maibé funsionáriu sira fahe ba turnu rua (2) kompostu husi funsionáriu sira ne’ebé hela do’ok husi edifisiu servisu iha parte dader no sira (funsionários) ne’ebé hela besik iha edifisiu servisu iha parte loron kraik.
Membru seguransa sivil ne’ebé haknaar-an iha eskritoriu Departamentu Solidariedade Sosial esplika ba Fiskalizadór sira katak, funsionariu sira inklui kargu xefias iha Departamentu refere só servisu de’it iha oras parte dader no iha oras loron kraik la presta servisu ba públiku ho razaun kumpri regras EE.
Bazeia ba Dekretu Governu No 9/2020, de 29 de Maio, iha Artigo 17, fatin servisu sira tenke garante katak ema sira ne’ebé servisu iha fatin servisu “nia laran” iha distãncia metro ida ho balun (1 ½) entre sira. Fatin servisu sira disponibliza meios necessaries, ezemplu sabaun no bee hodi fase liman.