Data, 20-06-2008
Provedor dos Direitos Humanos e Justiça nu’udar órgaun indepedente ida ne’ebé prevé iha Konstituisaun RDTL Artigu 27 katak Provedor dos Direitos Humanos e Justiça iha knaar atu haree no buka hatán sidadaun sira-nia keixas hasoru podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali justisa.
Bazeia ba mandatu ne’ebé iha Provedoria dos Direitos Humanos e Justiça (PDHJ) ofisialmente asina akordu de Entedimentu (MoU) ho NGOs sira iha distritus atu Harii Rede Monitorizasaun no Advokasia..
Dr. Sebastião Dias Ximenes, Provedor hateten “ho estabelese Rede Monitorizasaun no Advokasia ne’e atu habelar servisu monitorizasaun PDHJ nian iha area rural atu bele proteje no promove ema hotu-hotu nia direitu tuir legalidade ne’ebé konsagra ona iha Konstituisaun RDTL no konvensaun internasionál ne’ebé estadu Timor-Leste ratifika ona”.
“ PDHJ buka NGOs sira iha distritu atu servisu hamutuk no halo kordenasaun iha area direitus humanus liu-liu ba monitorizasaun iha sela Polísia, Prizaun no asaun forsa em jerál hasoru komunidade husi PNTL no F-FDTL iha terenu” hatutan Dr. Sebastião.
Liu tan Dr. Sebastião klarifika katak “ PDHJ hakarak koopera ho NGOs sira iha area direitu ekonomia sosiál no kultura”.
Servisu Rede nian iha báze mak atu hala’o monitorizasaun ba sela polísia, prizaun, asaun forsa PNTL no F-FDTL nian hasoru komunidade iha terenu no hala’o monitorizasaun ba area ekonomia sosiál nian liu-liu kona-ba saúde no edukasaun.
Iha parte advokasia Rede sei hala’o knaar hala’o advokasia iha nivel nasionál husi PDHJ tuir rezultadu monitorizasaun kona-ba alegasaun violasaun direitos humanos ne’ebé mosu iha báze liu husi rekomendasaun ba instituisaun kompetente. Sei hala’o mós advokasia iha nivel distritu husi NGOs tuir rezultadu monitorizasaun kona-ba alegasaun violasaun direitos humanos ne’ebé mosu iha báze liu husi rekomendasaun ba instituisaun kompetente. Nune’e mós bele halo advokasia hamutuk iha nivel nasionál no distritu sira husi PDHJ no Rede (NGOs).
NGOs sira ne’ebé sai membru iha Rede ne’e mak, NGO sira ne’ebé servisu iha area direitos humanos hanesan NGO Lujerio, Ica Tutunu, Fundasaun Masimo, Centru Edukasaun Sivika Ponta Leste, Fundasaun ECM Baucau, NGO Cailolo, Fundasaun hametin Domin, FUCA, Centru Juventude Covalima/Taroman Partnership Service, Fundasaun Moris Foun Maliana, Hametin Demokrasia no Igualdade.
Presiza informasaun Kontaktu
Lady Ximenes
Informasaun & Relasaun Públika PDHJ
Telemovel 726 1843 ou 333 1071