Date, 24-10-2011
Provedoria dos Direitos Humanos e Justiça (PDHJ) presiza kontinua fó treinamentu ba lideransa komunitaria sira toó suku no aldeia sira. Tanba lideransa komunitaria presiza informasaun hodi habelar fila fali ba komunidade sira iha aria rural. Lia hirak neé hatoó husi Cipriano Cabral, Sefi Suku Laisorulai Decima, Sub Distritu Quelicai Distritu Baucau loron 18 Outubro 2011 bainhira tuir treinamentu kona-ba direitus humanos, analiza konflitu no mediasaun iha Distritu Baucau.
“Ami nuúdar lideransa komunitaria presiza duni informasaun kona-ba direitus humanos nuneé ami fó nafatin oportunidade ba PDHJ liu husi diresaun nasional direitus humanos atu bele fó treinamentu ba lideransa komunitaria hodi bele kapasita lideransa komunitaria sira toó iha suku no aldeia sira. Hatutan Sefi Suku Laisorulai Decima”.
Sr. Valerio Magno Ximenes, Directur Nasional Direitus Humanos PDHJ hateten katak PDHJ pronto nafatin atu bele fahe informasaun ba lideransa komunitaria sira, tanba ida neé mós knaar importante ida husi PDHJ (diresaun nasional direitus humanos). Iha sorin seluk Valerio hateten liu husi treinamentu neé atu hakbiit lideransa komunitaria sira atu nuneé bele halaó sira-nia knaar ho diák iha baze.
Nuneé mós liu husi treinamentu neé bele ajuda lideransa komunitaria sira atu bele uza meus sira mak iha hodi rejolve kazu sivil sira mak akontese iha sira nia suku no aldeia laran.
“Iha oportunidade neé mós hatoó agradesimentu ba lideransa komunitaria sira nia aproveitamentu iha treinamentu neé toó remata. Maske informasaun neébé iha la barak maibe maske oituan PDHj fiar katak lideransa komunitaria sira bele hatutan ba komunidade sira” Hatutan Valerio”.
Treinamentu neé realiza tanba servisu hamutuk entre PDHJ liu husi direasaun nasional Direitus Humanos no Ministeriu Administrasaun Estatal (MAEOT) liu husi direasaun Nasional Administrasaun Apoiu Suku.
Treinamentu ne’e hala’o durante loron lima (17-21 Outubro 2011) ne’e nu’udar realizasaun husi akordu ne’ebé PDHJ liu husi diresaun Nasional Direitus Humanos asina ona ho MAEOT liu husi direasaun Nasional Administrasaun Apoiu Suku no MSS liu husi Diresaun Nasional Asistensia Sosial iha loron 8 Abril 2011 liu ba. Treinamentu konjunta entre PDHJ no MAEOT ho objetivu atu hasae kuinesimentu lideransa komunitaria sira nian kona-ba direitus humanos no mediasaun.
Materia treinamentu mak hanesan saida mak lideransa komunitaria, knar lideransa komunitaria ligasaun ho direitus humanos, dever lideransa komunitaria, karakteristika, prinsipiu direitus humanos, dever estadu promove no protégé direitus humanos, dever lideransa komunitaria hod protégé no promove direitus humanos iha komunidade, jeneru no direitus humanos, Lei Kontra Violensia Domestika no responsalidade lideransa komunitaria ba violensia domestika no mediasaun. Treinamentu iha distritu Baucau ba etapa segundu neébé partisipa husi lideransa komunitaria sira husi Sub Distritu Baquia, Quelicai no Sub Distritu Vemasse.
Bazeia ba Konstituisaun RDTL Artigu 27, Provedor dos Direitos Humanos e Justiça nu’udar órgaun indepedente ida iha knaar atu haree no buka hatán sidadaun sira-nia problema sakar podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali Justiça.
Presiza Informasaun Kontaktu
Lady Ximenes, TP Relasaun Públika PDHJ
Telemovel 7304260