Jenebra, 13 marsu 2025 – Provedór ba Direitus Umanus no Justisa Timor-Leste nian, Virgílio da Silva Guterres ‘Lamukan’, no Provedóra-Adjunta ba Direitus Umanus, Maria Marília da Costa partisipa iha Enkontru Bianuál dahuluk husi Aliansa Globál Instituisaun Nasionál sira Direitus Umanus nian (GANHRI) Grupu Servisu ba Direitus Umanus no Direitus Umanus Ema ho idozus (WG-HROP). Enkontru ne’e foka ba estratéjia sira hodi envolve Konsellu Direitus Umanus ONU nian (HRC) iha avansu direitu sira hosi ema ho idozu, partikularmente iha dezenvolvimentu konvensaun internasionál ida ne’ebé iha vinkulasaun legál hodi hametin protesaun globál sira.
Iha sorumutu ne’e, Provedór Virgílio Guterres manifesta nia apoiu tomak ba inisiativa ne’e, hodi kompromete atu halo advokasia ba rekoñesimentu no prioritizasaun direitu ema idozu sira nian.
Hanesan parte ida husi esforsu globál ida-ne’e, Provedoria ba Direitus Umanus no Justisa (PDHJ) husi Timor-Leste antes ne’e hamutuk ho NHRI 15 seluk hodi asina deklarasaun eskrita konjunta ne’ebé submete ba Sesaun ba dala 58 husi Konsellu Direitus Umanus ONU nian (24 Fevereiru – 4 Abril 2025). Lidera hosi Komisaun Nasionál Direitus Umanus Koreia nian, deklarasaun ne’e husu atu hakerek instrumentu internasionál foun ida ne’ebé iha vinkulasaun legál hodi proteje direitus umanus hosi ema sira ne’ebé idade ona. Ida-ne’e tuir dezenvolvimentu xave sira ONU nian, inklui Desizaun 14/1 hosi Grupu Traballu Abertu kona-ba ema ho idozu no Rezolusaun 78/324 hosi Asembleia Jerál ONU nian, ne’ebé rua ne’e destaka lakuna krítiku sira iha enkuadramentu protesaun globál.
Liuhusi envolvimentu ida-ne’e, PDHJ kontinua tane aas Timor-Leste nia kompromisu nasionál atu avansa padraun direitus umanus internasionál sira no halo advokasia ba protesaun legál ne’ebé forte liután ba ema idozus, hodi garante sira-nia dignidade no moris-di’ak hetan salvaguarda iha enkuadramentu nasionál no globál.
This post is also available in: English