Dili : Loron, 26 Abril 2022, Provedor Adjuntu ba area Governasaun di’ak, Sr. José Telo Soares Cristovão, akompaña husi Secretariu Executivu, Sr. Ambrosio Graçiano, nomós Diretor administrasaun Finansas, Sr. José Gonçalves, inklui tekniku espesializada nain ida, partisipa iha serimonia sesaun traballu Jornada Planeamentu ne’ebé realiza husi Ministeriu Finansas. Iha Sala Auditoriu Ministeriu Finansas Ai-tarak laran.
Ministru Finansas, Sr. Rui Augusto Gomes, iha nia intervensaun hateten, Sesaun Traballu Jornada Planeamentu ne’e realiza bazeia ba Lei enkuadramentu Orsamentu Jeral Estadu no Jestaun Finanseira Públikas, Oitavu Guvernu Konstitusional ne’ebé sei aprezenta Proposta Lei das Grandes Opçoes do Plano (GOP) no dokumentu adisional sira ba Parlamentu Nasional iha loron 10 Maio hodi deskute no aprova.
Ne’eduni atu kumpre prazu hirak ne’e,maka ohin Ministeriu Finansas realiza Sesaun Traballu “Jornada Planeamentu” hodi aprezenta no partilla informasaun kona-ba medida sira prinsipal no informasaun makro fiskal ba Orsamentu Jeral Estadu 2023 nian. Tanba atu asegura kualidade Lei das Grandes Opçoes do Plano (GOP) no dokumentu adisional sira, presiza mós kontribuisau no ideia husi parte hothotu.
Entretantu serimonia ne’e partisipa husi Primeiro Ministru Taur Matan Ruak, no nia estrutura inklui hetan partisipasaun masimu husi entidades relevante sira hotu inklui PDHJ.